បណ្ដាមេដឹកនាំខាងគណបក្សសាធារណរដ្ឋ កាលពីថ្ងៃព្រហស្បតិ៍ (ទី៦ ខែមិថុនា) បានឲ្យដឹងថា នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា លោកនឹង «បង្ហាញការពិត» អំពីសង្គ្រាមប្រឆាំងនឹងក្រុមហាម៉ាស នៅតំបន់ហ្កាហ្សា នៅពេលដែលលោកថ្លែងសុន្ទរកថាទៅកាន់សភាសហរដ្ឋអាមេរិក នៅថ្ងៃទី២៤ ខែកក្កដា អំឡុងពេលធ្វើទស្សនកិច្ចទៅកាន់ទីក្រុងវ៉ាស៊ីនតោន។

នៅក្នុងសេចក្តីថ្លែងការណ៍មួយ ប្រធានសភាលោក Mike Johnson និងមេដឹកនាំសំឡេងភាគតិចនៅព្រឹទ្ធសភា លោក Mitch McConnell បានឲ្យដឹងថា លោក Netanyahu នឹងនិយាយទៅកាន់សម័យប្រជុំរួមនៃសភាតំណាងរាស្រ្ត និងព្រឹទ្ធសភា។

ហើយតាមរយៈសេចក្តីថ្លែងការណ៍របស់ខ្លួន លោក Netanyahu បានលើកឡើងថា៖ «ខ្ញុំមានសេចក្ដីត្រេកអរជាពន់ពេក ក្នុងការទទួលបានឯកសិទ្ធិតំណាងឲ្យប្រទេសអ៊ីស្រាអែល នៅចំពោះមុខសភាទាំង២ និងដើម្បីបង្ហាញការពិតអំពីសង្រ្គាមដ៏យុត្តិធម៌របស់យើងប្រឆាំងនឹងអ្នកដែលព្យាយាមបំផ្លាញពួកយើង ចំពោះតំណាងប្រជាជនអាមេរិក និងពិភពលោកទាំងមូល»។

គួរបញ្ជាក់ថា ដំណើរទស្សនកិច្ចរបស់លោក Netanyahu កើតឡើងចំពេលមានភាពតានតឹង រវាងលោក និងប្រធានាធិបតីអាមេរិក លោក Joe Biden ដែលបានគាំទ្រយុទ្ធនាការរបស់អ៊ីស្រាអែល នៅតំបន់ហ្កាហ្សា ប៉ុន្តែថ្មីៗនេះបានរិះគន់កាន់តែខ្លាំង ចំពោះយុទ្ធសាស្ត្ររបស់ខ្លួន និងបានរារាំងការដឹកជញ្ជូនគ្រាប់បែកមួយចំនួន។

ហើយភ្លាមៗនេះ គេនៅមិនច្បាស់ទេថា តើអំឡុងទស្សនកិច្ចនៅសហរដ្ឋអាមេរិកនោះ លោក Netanyahu នឹងជួបជាមួយលោក Biden ដែរ ឬយ៉ាងណា៕