ក្រុមសកម្មជនក្នុងស្រុក និយាយថា ចរកជនជាង ៥០០នាក់ មកពីសហគមន៍ជុំវិញតំបន់ឆ្នេររដ្ឋ Sabah ប្រទេសម៉ាឡេស៊ី ត្រូវបានគេបណ្តេញចេញពីផ្ទះសម្បែងរស់នៅរបស់ពួកគេក្នុងសប្តាហ៍នេះ ដែលជាផ្នែកមួយនៃវិធានការបោសសម្អាតជនអន្តោប្រវេសន៍ខុសច្បាប់ ។

 រូបភាពវីដេអូឃ្លីប ឃើញមនុស្សប្រុសជាច្រើននាក់ រុញខ្ទមឈើនៅលើឆ្នេរ ស្ថិតក្នុងឧទ្យានសមុទ្រ Tun Sakaran មុនពេលដុតកម្ទេចវាចោល ខណៈដែលរូបភាពវីដេអូឃ្លីបមួយផ្សេងទៀត ឃើញផ្ទះសម្បែងរងការខូចខាតជាច្រើនខ្នង នៅជាប់មាត់សមុទ្រ ។

 ផ្ទះតំបន់ឆ្នេរទាំងនេះ គឺជារបស់សហគមន៍ Bajau Laut គឺជាសហគមន៍របស់ចរកជនគ្មានរដ្ឋ ។ រស់នៅដោយគ្មានឯកសារអត្តសញ្ញាណ ភាគច្រើននៃពួកគេ ពុំទទួលបានការគាំទ្រចាំបាច់នោះទេ ដូចជាការអប់រំ ហិរញ្ញវត្ថុ ឬសេវាកម្មសុខភាព ។

 ពួកគេរស់នៅដោយការភ័យខ្លាចគេនិរទេស ឬឃាត់ខ្លួនដោយក្រុមអាជ្ញាធរអន្តោប្រវេសន៍ ដែលមិនធ្វើឲ្យមានភាពខុសគ្នារវាងពលរដ្ឋគ្មានរដ្ឋ និងជនអន្តោប្រវេសន៍ខុសច្បាប់ ។

សូមបញ្ជាក់ថា ក្រុមអាជ្ញាធរម៉ាឡេស៊ី ចាប់ផ្តើមបង្ក្រាបការតាំងលំនៅខុសច្បាប់ទាំងក្នុង និងជុំវិញទីក្រុងកូឡាឡាំពួ ក្នុងគោលបំណងបញ្ឈប់ជនអន្តោប្រវេសន៍ខុសច្បាប់ពីការចូលរដ្ឋធានីមួយនេះ ។

ទោះបីជាយ៉ាងណាក៏ដោយ ក្រុមសិទ្ធិមនុស្ស បានលើកឡើងពីក្តីកង្វល់ចំពោះប្រតិបត្តិការបោសសម្អាតរបស់ពួកគេ ៕