នគរបាល នៅថ្ងៃសុក្រ (ទី៦ ខែមិថុនា) បាននិយាយថា មនុស្ស ៣នាក់ ត្រូវបានចាប់ខ្លួនពីបទបែរខ្នងរបស់ខ្លួន ហើយបានទៅអង្គុយនៅកៅអីដែលទំនេរ អំឡុងពេលចាក់ភ្លេងជាតិរបស់ប្រទេសចិន នៅមុនការប្រកួតបាល់ទាត់វគ្គជម្រុះ World Cup រវាងក្រុមម្ចាស់ផ្ទះហុងកុង និងក្រុមភ្ញៀវអ៊ីរ៉ង់។

អ្នកគាំទ្របាល់ទាត់ ក្នុងទីក្រុងហុងកុង ធ្លាប់បានស្រែកចំអកដាក់ភ្លេងជាតិ ជាការបង្ហាញពីការមិនពេញចិត្តផ្នែកនយោបាយ ប៉ុន្តែរដ្ឋបាលទីក្រុង ក្នុងឆ្នាំ២០២០ បានហាមឃាត់ការធ្វើបែបនេះជាផ្នែកមួយនៃការបង្រ្កាបកាន់តែទូលំទូលាយ បន្ទាប់ពីមានការតវ៉ាដ៏ធំ នៅក្នុងទីក្រុងនេះ។

នៅឯកីឡដ្ឋានរបស់ទីក្រុង Hong Kong កាលពីថ្ងៃព្រហស្បតិ៍ នគរបាលបាននិយាយថា បុរស ២នាក់ និងស្ត្រីម្នាក់ ត្រូវបានចាប់ខ្លួន ដោយសារតែពួកគេ «បែរខ្នងឆ្ពោះទៅរកទីលាន ហើយមិនឈរគោរពភ្លេងជាតិ»។ សេចក្តីថ្លែងការណ៍មួយបានឲ្យដឹងថា៖ «នគរបាលបានសង្កត់ធ្ងន់ថា នរណាម្នាក់ដែលជេរប្រមាថជាសាធារណៈ និងដោយចេតនា ចំពោះបទភ្លេងជាតិ នៅក្នុងវិធីណាមួយក៏ដោយ គឺជាការប្រព្រឹត្តិបទល្មើសព្រហ្មទណ្ឌ»។

អ្នកទាំង៣ ដែលត្រូវបានចាប់ខ្លួន មានអាយុចន្លោះពី ១៨ឆ្នាំ ទៅ ៣១ឆ្នាំ។ ប្រសិនបើត្រូវបានផ្តន្ទាទោស នោះពួកគេត្រូវប្រឈមនឹងការជាប់ពន្ធនាគារ រហូតដល់ ៣ឆ្នាំ និងពិន័យជាប្រាក់ចំនួន ៥០.០០០ដុល្លារហុងកុង (៦.៤០០ដុល្លារអាមេរិក)៕