ដោយកាត់ចេញពីលោកខាងលិច រុស្ស៊ីកំពុងជំរុញសេដ្ឋកិច្ច ២សែនកោដិដុល្លាររបស់ខ្លួនទៅកាន់ប្រទេសធំៗជាច្រើន ដូចជាចិន និងអារ៉ាប៊ីសាអ៊ូឌីតជាដើម ហើយជាមួយនឹងប្រទេសដែលមានការរំពឹងទុករយៈពេលវែង ដូចជាហ្សីមបាវ៉េ និងអាហ្វហ្គានីស្ថាន នៅឯវេទិកាវិនិយោគចម្បងរបស់ខ្លួន នាទីក្រុង St Petersburg ដែលត្រូវបានបង្កើតឡើងដោយមហាអំណាចរុស្ស៊ី ជាបង្អួចឆ្ពោះទៅកាន់តំបន់អឺរ៉ុប។

សង្រ្គាមនៅអ៊ុយក្រែនបាននាំឲ្យមានភាពចលាចលដ៏ធំបំផុត នៅក្នុងទំនាក់ទំនងរបស់រុស្ស៊ី ជាមួយលោកខាងលិច គិតចាប់តាំងពីវិបត្តិមីស៊ីលគុយបាឆ្នាំ១៩៦២ ហើយការដាក់ទណ្ឌកម្មរបស់លោកខាងលិច បានបង្ខំឲ្យមានបដិវត្តន៍ម្តង ក្នុងរយៈពេល ១សតវត្សរ៍ នៅក្នុងទំនាក់ទំនងសេដ្ឋកិច្ចរបស់រុស្ស៊ី។

ចាប់តាំងពីអធិរាជ Peter the Great បានបង្កើតមូលដ្ឋានគ្រឹះនៃរដ្ឋរុស្ស៊ីសម័យទំនើប ហើយបានធ្វើឲ្យទីក្រុង St Petersburg ក្លាយជារដ្ឋធានី នៅដើមសតវត្សរ៍ទី១៨ អ្នកគ្រប់គ្រងរបស់រុស្ស៊ីបានសម្លឹងមើលទៅលោកខាងលិចថា ជាប្រភពនៃបច្ចេកវិទ្យា ការវិនិយោគ និងគំនិត។

តែការលុកលុយរបស់អ៊ុយក្រែនឆ្នាំ២០២២ បានបង្ខំឲ្យប្រធានាធិបតី លោក Vladimir Putin ងាកទៅរកអាស៊ី និងពិភពលោកផ្សេងទៀត ដែលមិនមែនជាលោកខាងលិច អំឡុងពេលមាននូវអ្វី ដែលវិមានក្រឹមឡាំងនិយាយថា ស្មើនឹងការបិទផ្លូវសេដ្ឋកិច្ច ដោយសហរដ្ឋអាមេរិក និងសម្ព័ន្ធមិត្តអឺរ៉ុបរបស់ខ្លួន។

យ៉ាងណាក្ដី ទណ្ឌកម្មរបស់លោកខាងលិចមិនបានធ្វើឲ្យសេដ្ឋកិច្ចរបស់រុស្ស៊ីប៉ះពាល់នោះទេ ហើយទីក្រុងមូស្គូបានពង្រឹងទំនាក់ទំនងជាមួយប្រទេសចិន មហាអំណាចក្នុងតំបន់មជ្ឈិមបូព៌ា ហើយនិងទូទាំងទ្វីបអាហ្រ្វិក និងអាមេរិកឡាទីន៕