​បាល់ទាត់៖ ក្រុម​​អាស៊ី​អឺរ៉ុប​យូ​ណាយ​ធី​តទំនង​នាំយក​កីឡាករ​បរទេស ២​រូបមក​ពង្រឹង​ក្រុម​នៅ​ជុំ​ទី​២ នៃ​លី​គ​កំពូល​កម្ពុជា បន្ទាប់ពី​ធ្លាយ​ដំណឹង​ខ្សែប្រយុទ្ធ​ស្នូល​របស់ខ្លួន Abee Ndioo Hurber ត្រូវ​ចាកចេញ​នៅ​ជុំ​ទី​២ កាលពី​ថ្មីៗ។​

​កីឡាករ​បរទេស ២​រូបដែល​ត្រូវបាន​គេ​មើលឃើញ​បាន​ចូលរួម​ធ្វើតេស្ដ ​ជាមួយ​ក្រុម​អាស៊ី​អឺរ៉ុប កាលពី​ថ្មីៗរួមមាន​ខ្សែប្រយុទ្ធ​នី​ហ្សេ​រី​យ៉ា Rasheed Omokafe Adeyanju និង​កីឡាករ Okoro Matthew Osa ដែលជា​កីឡាករ​មានបទពិសោធន៍​ជោគជាំ​នៅ​លី​គ​កំពូល​កម្ពុជា តាមរយៈ​ការលេង​ឲ្យ​ក្លិប​មួយចំនួននាពេល​កន្លងមក។​ ​តាម​ការ​បង្ហើប​ឲ្យ​ដឹង ក្រៅពី​កីឡាករ​បរទេស Omokafe និង Matthew Osa ក្រុម​កំពុង​ឈរ​លេខ​រៀង​ទី​៩ ក្នុង​លី​គ​បណ្ដោះអាសន្ន​នេះ ក៏​នឹង​បន្ថែម​កីឡាករ​ក្នុងស្រុក​មួយចំនួននៅ​ជុំ​ទី​២ ផងដែរ ប៉ុន្ដែ​មិនមាន​ការនាំ​ចូល​ពី​ក្រៅ​នោះទេ ពោលគឺ​ជ្រើសរើស​ចេញពី​ក្រុមយុវជន​ថ្នាល U-18 របស់ខ្លួន​ផ្ទាល់​តែម្ដង។​

​គួរ​ដឹងថា ការត្រៀម​ជើង​ព្រួល​នាំចូល​កីឡាករ​បរទេស​របស់​ក្រុម​អាស៊ី​អឺរ៉ុប​នេះ បន្ទាប់ពី​កីឡាករ Abee Ndjoo Hurber បាន​បង្ហោះ​សារ​មួយ​កាលពី​ថ្មីៗ ដោយ​បង្ហាញ​ពី​ការចុះ​កុងត្រា​ជាមួយ​ក្លិប​បឹងកេត ប៉ុន្ដែ​ភ្លាមៗសារ​នោះក៏​ត្រូវបាន​ខ្សែប្រយុទ្ធ​សញ្ជាតិ​កា​មេ​រ៉ុ​ន​រូបនេះលុប​ចោល​​វិញ ខណៈ​មកទល់ពេលនេះគេ​ពុំទាន់​ឃើញ​បឹងកេត​ប្រកាស​ជា​ផ្លូវការ​នោះទេ ដ្បិត​ការប្រកួត​លី​គ​ជុំ​ទី​១ មិនទាន់​បញ្ចប់​នៅឡើយ៕

​អត្ថបទ៖ លី ឈុន​ឡា