សម្រាប់អ្នកស្រី Aurora Sanchez គឺជាមន្រ្តីក្រុងជនជាតិភាគតិច Zapotec មកពីទីក្រុង San Bartolome Quialana រដ្ឋ Oaxaca ស្ថិតនៅភាគខាងត្បូងម៉ិកស៊ិក យល់ឃើញថា ការជ្រើសរើសប្រធានាធិបតីស្រ្តីលើកដំបូងរបស់ម៉ិកស៊ិក គឺជាប្រភពនៃក្តីសង្ឃឹម ។

អ្នកស្រី Sanchez ដែលខ្លួនគាត់ផ្ទាល់ជាស្រ្តីលើកដំបូងកាន់តំណែងនៅសាលាក្រុង San Bartolome Quialana កាលពីដើមឆ្នាំ ២០២៣នោះ និយាយថា ការបោះឆ្នោតជ្រើសរើសលោកស្រី Claudia Sheinbaum ជាប្រធានាធិបតី អាចនឹងត្រួសត្រាយផ្លូវឲ្យមានស្រ្តីកាន់តែច្រើនកាន់តំណែងការងាររដ្ឋ ។

អ្នកស្រី Sheinbaum ដែលជាអ្នកវិទ្យាសាស្រ្តអាកាសធាតុ និងជាអតីតអភិបាលក្រុង Mexico City បានឈ្នះការបោះឆ្នោតភ្លូកទឹកភ្លូកដី ដើម្បីក្លាយជាប្រធានាធិបតីស្រ្តីលើកដំបូងរបស់ម៉ិកស៊ិកកាលពីថ្ងៃអាទិត្យ ។

ជ័យជំនះសម្រាប់លោកស្រី Sheinbaum ត្រូវបានគេចាត់ទុកថាជាជំហានដ៏ធំមួយសម្រាប់ម៉ិកស៊ិក ដែលជាប្រទេសមានពលរដ្ឋកាតូលិករ៉ូម៉ាំងច្រើនបំផុតលំដាប់ទី ២របស់ពិភពលោក ៕