ក្រសួងការបរទេសចិន នៅថ្ងៃសុក្រ (ទី៧ មិថុនា) នេះ បាននិយាយថា ទីក្រុងប៉េកាំងនឹងអនុញ្ញាតឲ្យប្រទេសហ្វីលីពីនបញ្ជូនសម្ភារផ្គត់ផ្គង់ចាំបាច់ទៅកាន់នាវាចម្បាំងដែលចត នៅតំបន់ថ្មប៉ប្រះទឹក ដែលមានជម្លោះ ក្នុងសមុទ្រចិនខាងត្បូង ប្រសិនបើខ្លួនត្រូវបានផ្តល់ការជូនដំណឹងជាមុន។

ការអត្ថាធិប្បាយនេះ គឺដើម្បីឆ្លើយតបទៅនឹងការចោទប្រកាន់របស់ឆ្មាំសមុទ្រហ្វីលីពីន ដែលថា សមភាគីចិនរបស់ខ្លួន បានរារាំងកិច្ចប្រឹងប្រែង ដើម្បីជម្លៀសសមាជិកដែលមានជំងឺនៃកងកម្លាំងប្រដាប់អាវុធរបស់ខ្លួន នៅក្នុងសមុទ្រចិនខាងត្បូង ដោយហៅសកម្មភាពនេះថា «ព្រៃផ្សៃ និងអមនុស្សធម៌»។

គួរបញ្ជាក់ថា ហេតុការណ៍ដែលហ្វីលីពីន បាននិយាយថា បានកើតឡើងកាលពីខែមុននោះ មានពាក់ព័ន្ធនឹងសមាជិកនៃកងម៉ារីនតូចមួយ ដែលបានឈរជើងនៅប៉ុស្តិ៍ ដើម្បីការពារនាវា BRP Sierra Madre ដែលជានាវាហ្វីលីពីន ត្រូវបានចត នៅតំបន់មានជម្លោះ គឺតំបន់ថ្មប៉ប្រះទឹក Second Thomas Shoal ដែលចិនហៅថា Renai Reef។

សូមបញ្ជាក់បន្ថែមថា ហ្វីលីពីន និងចិន បានប៉ះទង្គិចគ្នាម្តងហើយម្តងទៀត កាលពីឆ្នាំមុន នៅជិតតំបន់ភូមិសាស្ត្រមានជម្លោះដែលស្ថិតនៅក្នុងតំបន់សេដ្ឋកិច្ចផ្តាច់មុខរបស់ទីក្រុងម៉ានីល។ ចិនតែងតែចោទប្រកាន់ហ្វីលីពីនជាប្រចាំពីការរំលោភចូលដែនទឹករបស់ខ្លួន ខណៈដែលទីក្រុងម៉ានីល និងសម្ព័ន្ធមិត្ត បានថ្កោលទោសនូវអ្វីដែលពួកគេហៅថា ជាអំពើឈ្លានពានរបស់ទីក្រុងប៉េកាំង៕