កាលពីថ្ងៃព្រហស្បតិ៍ម្សិលមិញ អគ្គលេខាធិការអង្គការសហប្រជាជាតិ(UN)លោក Antonio Guterres បានផ្ញើមរណទុក្ខដល់បុគ្គលិកទីភ្នាក់ងារការងារសង្រ្គោះអង្គការសហប្រជាជាតិ(UNRWA)ចំនួន ១៣៥នាក់ ដែលត្រូវបានសម្លាប់នៅក្នុងតំបន់ហ្កាហ្សាស្រ្ទីប អំឡុងសង្រ្គាមរយៈពេល ៩ខែរបស់អ៊ីស្រាអែលនៅតំបន់បិទច្រកមួយនេះ ។

លោក Guterres បានថ្លែងបែបនេះ នៅក្នុងពិធីរំឭកអនុស្សាវរីយ៍ដល់បុគ្គលិក UNទាំងអស់ដែលបានបាត់បង់អាយុជីវិតរបស់ពួកគេ ពេលបំពេញភារកិច្ចកាលពីឆ្នាំមុន អំឡុងឆ្នាំ ២០២៣ ។

ពាក់ព័ន្ធនឹងបុគ្គលិក UNRWA ដែលត្រូវបានសម្លាប់ក្នុងតំបន់ហ្កាហ្សា ចាប់តាំងពីខែតុលា ឆ្នាំមុន លោក Guterres និយាយថា ពួកគេរស់ និងស្លាប់ក្នុងនាមជាអ្នកតំណាងឲ្យសហគមន៍អន្តរជាតិនៅតំបន់ហ្កាហ្សា ។

លោកបានថ្លែងបែបនេះ នៅថ្ងៃដែលអ៊ីស្រាអែល វាយប្រហារលើសាលារៀនមួយកន្លែងដែលជាជំរំរបស់ UNRWA នៅទីក្រុង Nuseirat ស្ថិតនៅភាគកណ្តាលតំបន់ហ្កាហ្សា និងជាទីជម្រកសម្រាប់ជនប៉ាឡេស្ទីនភៀសខ្លួន ៦ពាន់នាក់ ដោយបានសម្លាប់មនុស្សយ៉ាងហោច ៣៥នាក់ ៕