របាយការណ៍មួយ បានបង្ហាញនៅថ្ងៃសុក្រនេះថា មេដឹកនាំកូរ៉េខាងជើងលោក គីម ជុងអ៊ុន បានបង្កើនសកម្មភាពសាធារណៈទាក់ទងនឹងយោធាយ៉ាងសំខាន់ ក្នុងអំឡុងខែមីនាដល់ខែឧសភា បន្ទាប់ពីលោកបានប្តេជ្ញាដោះស្រាយទំនាក់ទំនងអន្តរកូរ៉េជាមួយនឹងការកើនឡើងនៃអរិភាព។

លោក គីម បានចូលរួមក្នុងសកម្មភាពសាធារណៈចំនួន ៣៣ដង ក្នុងអំឡុងពេលបីខែ ដែលបញ្ចប់ក្នុងខែឧសភា កើនឡើង ៥៩ភាគរយពីមធ្យមភាគ ២០ដង ដែលបានកត់ត្រាសម្រាប់រយៈពេលដូចគ្នា ពីឆ្នាំ ២០២១ ដល់ឆ្នាំ ២០២៣។ នេះបើយោងតាមរបាយការណ៍របស់វិទ្យាស្ថានរដ្ឋកូរ៉េសម្រាប់ការបង្រួបបង្រួមជាតិ (KINU) ។

របាយការណ៍ បាននិយាយថា ក្នុងចំណោមពួកវាទាំងនោះ ចំនួននៃសកម្មភាពសាធារណៈទាក់ទងនឹងយោធាមានដល់ ១៩ដង គឺកើនឡើង ១៨៤ភាគរយពីសកម្មភាពជាមធ្យមរយៈពេល៣ឆ្នាំ គឺ ៦ដង។

KINU តាមដានសកម្មភាពរបស់លោក គីម និងមន្ត្រីគណបក្សសំខាន់ៗចំនួនបីផ្សេងទៀត ដោយការវិភាគរបាយការណ៍ពីប្រព័ន្ធផ្សព្វផ្សាយរដ្ឋ ដូចជាទីភ្នាក់ងារសារព័ត៌មានមជ្ឈិមកូរ៉េ និង Rodong Sinmin ដែលជាសារព័ត៌មានសំខាន់របស់ប្រទេសនេះ។

គួរកត់សម្គាល់ថា លោក គីម បានត្រួតពិនិត្យ ឬណែនាំសមយុទ្ធយោធាចំនួន ៦ដងក្នុងអំឡុងពេលដែលបានលើកឡើង ដោយការត្រួតពិនិត្យដល់ទីកន្លែងធ្វើចំនួន ៥ដង នៅក្នុងខែមីនា នៅពេលដែលកងទ័ពកូរ៉េខាងជើង បានបញ្ចប់សមយុទ្ធយោធារដូវរងា។