សេវាកម្មសង្រ្គោះបន្ទាន់ និយាយថា ហេតុការណ៍ផ្ទុះ និងអគ្គិភ័យនៅក្នុងហាងលក់គ្រឿងសំណង់នៅភាគឦសានប្រទេសរ៉ូម៉ានី បណ្តាលឲ្យមនុស្ស ១៣នាក់ រងរបួស ។

ទីភ្នាក់ងារឆ្លើយតបសង្រ្គោះបន្ទាន់រដ្ឋាភិបាលរ៉ូម៉ានី និយាយថា ការផ្ទុះបណ្តាលឲ្យកើតមានអគ្គិភ័យនៅហាង Dedeman ស្ថិតនៅតំបន់ជាយក្រុង Botosani ។

ក្រសួងសុខាភិបាល និយាយថា មនុស្សរងរបួស ៤នាក់ ស្ថិតក្នុងស្ថានភាពធ្ងន់ធ្ងរ ហើយត្រូវបានដឹកតាមឧទ្ធម្ភាគចក្រទៅកាន់មន្ទីរពេទ្យនៅទីក្រុងភាគខាងកើត Iasi និងរដ្ឋធានី Bucharest ។

ក្រុមអាជ្ញាធរ និយាយថា មនុស្សជាង ១០០នាក់ អាចចេញពីក្នុងហាងបាន ក្រោយហេតុការណ៍ផ្ទុះ ។ ក្រុមភ្នាក់ងារពន្លត់អគ្គិភ័យ បានពន្លត់អណ្តាតភ្លើង ហើយពុំបានរកឃើញមានគ្រោះថ្នាក់ផ្សេងទៀតនោះឡើយនៅក្នុងអគារ ។

ក្រុមអាជ្ញាធរ និយាយថា បច្ចុប្បន្នពួកគេកំពុងស៊ើបអង្កេតលើមូលហេតុបណ្តាលឲ្យមានការផ្ទុះនៅក្នុងហាងមួយនេះ ៕