ភ្នំពេញ ៖ ក្រោយឆ្លងកាត់ការប្រកួតប្រជែងជម្រុះ៣ដំណាក់កាល ក្នុងកម្មវិធីប្រឡងប្រជែងអ្នកកែច្នៃគ្រាប់ស្វាយចន្ទីឆ្នើម ឆ្នាំ២០២៤ ជាលទ្ធផលបានបង្ហាញឲ្យដឹងថា សិប្បកម្មគ្រាប់ស្វាយចន្ទីចំការលើ ឡឹង ម៉ានុត មកពីចំការលើខេត្តកំពង់ចាម ទទួលបានជ័យលាភីលេខ១ ខណៈលេខ២ បានទៅលើ សហគ្រាស ៣កូអេកូ មកពីខេត្តកំពង់ធំ និងលេខ៣ បានទៅលើសិប្បកម្មកែច្នៃគ្រាប់ស្វាយចន្ទី ជ័យ សំបូរ មកពីខេត្តកំពង់ធំដូចគ្នា។

​ឯកឧត្តម អ៊ួង កុសល រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក្នុងពិធីបិទកម្មវិធីប្រឡងប្រជែង កាលពីរសៀលថ្ងៃទី៦ ខែមិថុនានេះ បានមានប្រសាសន៍ថា កម្មវិធីនេះគឺជាព្រឹត្តការណ៍ដ៏សំខាន់មួយ ដែលបានបង្កើតនូវឱកាសសម្រាប់សហគ្រាស សិប្បករ រោងចក្រ អ្នកកែច្នៃទាំងអស់ឱ្យបានចូលរួមប្រគួតប្រជែង ដោយបានជំរុញ និងលើកកម្ពស់ការអភិវឌ្ឍវិស័យស្វាយចន្ទី តាមរយៈបច្ចេទេសកែច្នៃគ្រាប់ស្វាយចន្ទី ការប្រកួត ប្រជែងទីផ្សារ និងការបន្ថែមរសជាតិ លើផលិតផលគ្រាប់ស្វាយចន្ទីជាដើម។ ជាមួយនេះ ឯកឧត្តម បានលើកទឹកចិត្តដល់អ្នកកែច្នៃ សិប្បកម្ម រោងចក្រ សហគ្រាសកែច្នៃទាំងអស់ ដែលមិនបានជាប់ជ័យលាភី កុំមានការអាក់អន់ចិត្ត តែសូមខិតខំប្រឹងប្រែងបន្ថែមទៀត។ 

លោក ឡឹង រ៉ាវុធ នាយករងសិប្បកម្មគ្រាប់ស្វាយចន្ទីរចំការលើ ឡឹង ម៉ានុត ដែលទទួលបានជ័យលេខ១ បានបង្ហាញនូវអារម្មណ៍រំភើបសប្បាយរីករាយ និងលើកឡើងថា កម្មវិធីប្រកួតកែច្នៃគ្រាប់ស្វាយចន្ទីនេះ នឹងបង្កើនទំនុកចិត្តក្រុមហ៊ុន សហគ្រាសផលិតកម្មកសិផលខ្មែរសម្រាប់ទីផ្សារ។ លោកបានឲ្យដឹងថា ក្រោយពីទទួលបានជ័យលាភីនេះ សិប្បកម្មរបស់លោក គ្រោងនឹងពង្រីកទីផ្សារបន្ថែមទៀតទៅកាន់ទីផ្សារក្រៅប្រទេស ខណៈប្រទេសកម្ពុជាបានចូលជាធរមានក្នុងកិច្ចព្រមព្រៀងពាណិជ្ជកម្មសេរី ជាមួយកូរ៉េ និងចិន ក៏ដូចជាពង្រីកថែមទៀតទៅកាន់ប៉ែកអឺរ៉ុប ដោយសារសិប្បកម្មមានការទទួលស្គាល់និងគាំទ្រពីសំណាក់រាជរដ្ឋាភិបាលក្នុងស្រុក។

កម្មវិធីប្រឡងប្រជែងអ្នកកែច្នៃគ្រាប់ស្វាយចន្ទីឆ្នើម ឆ្នាំ២០២៤ រៀបចំឡើងដោយក្រសួងកសិកម្ម រុក្ខាប្រមាញ់ និងនេសាទ ក្នុងគោលបំណងផ្សព្វផ្សាយ ស្វែងរកសហគ្រាសកែច្នៃផលិតផលគ្រាប់ស្វាយចន្ទីឆ្នើមបំផុត និងជំរុញ លើកកម្ពស់ការអភិវឌ្ឍន៍វិស័យស្វាយចន្ទី តាមរយៈយន្តការអនុវត្តផលិតកម្មកសិកម្មតាមកិច្ចសន្យា បច្ចេកទេសការកែច្នៃគ្រាប់ស្វាយចន្ទី ការវិភាគសេដ្ឋកិច្ចការកែច្នៃគ្រាប់ស្វាយចន្ទី ការប្រកួតប្រជែងទីផ្សារ និងការបន្ថែមរស់ជាតិលើផលិតផលគ្រាប់ស្វាយចន្ទី។ កម្មវិធីនេះ បានចាប់ផ្តើមនៅថ្ងៃទី៩ ខែឧសភា រហូតដល់ថ្ងៃទី៦ ខែមិថុនា ឆ្នាំ២០២៤ ដោយមានអ្នកចូលរួមប្រឡងមានចំនួនសរុប២០សិប្បករ៕

អត្ថបទ ៖ ឈិត បូរ៉ាវី