ពោធិ៍សាត់ ៖ ក្រសួងបរិស្ថានរួមជាមួយអង្គការសម្ព័ន្ធមិត្តសត្វព្រៃនិងអាជ្ញាធរខេត្តពោធិ៍សាត់បើកកិច្ចប្រជុំដើម្បីទទួលបានការព្រមព្រៀងដោយសេរី ជាមុន និងមានព័ត៌មានគ្រប់គ្រាន់ (អេហ្វពីក)ក្នុងការអនុវត្តន៍គម្រោងរេដបូកជួរភ្នំក្រវាញខាងត្បូង។ នៅឃុំអូរសោម ស្រុកវាលវែង ខេត្ដពោធិ៍សាត់ នាថ្ងៃទី៧ ខែមិថុនា ឆ្នាំ ២០២៤។

កិច្ចប្រជុំនេះគឺជាលើកទី៨ហើយ ដែលក្រសួងបរិស្ថាន រួមជាមួយអង្គការសម្ព័ន្ធមិត្តសត្វព្រៃ និងអាជ្ញាធរខេត្ត ពោធិ៍សាត់ បានរៀបចំកិច្ចប្រជុំផ្សព្វផ្សាយអំពីគម្រោងរេដបូកជួរភ្នំក្រវាញខាងត្បូង នៅឃុំអូរសោម ព្រមទាំងរៀបចំឱ្យប្រជាពលរដ្ឋចូលរួមបោះឆ្នោតជាសម្ងាត់ប្រកបដោយអព្យា ក្រឹតភាព និងតម្លាភាព ផ្ដល់ការគាំទ្រដល់ការ អនុវត្តន៍គម្រោងរេដបូកជួរភ្នំក្រវាញខាងត្បូង ក្នុងបំណងលើក កម្ពស់ជីវភាពសហគមន៍ ព្រមទាំងអភិរក្សព្រៃឈើ និងជីវៈចម្រុះប្រកបដោយនិរន្ដរភាពនាពេលបច្ចុប្បន្ននិងអនាគត។

កិច្ចប្រជុំផ្សព្វផ្សាយស្ដីពីគម្រោងរេដបូកជួរភ្នំក្រវាញខាង ត្បូងនេះ ទើបនឹងត្រូវបានរៀបចំហើយនៅតំបន់ឆាយអារ៉ែង ខេត្តកោះកុង ដោយមានប្រជាពលរដ្ឋសមាជិកសហគមន៍មូលដ្ឋាន និងសហគមន៍ជនជាតិដើមភាគតិច ជង ចូលរួមយ៉ាងច្រើនកុះករ ព្រមទាំងបានចូលរួមបោះឆ្នោតសម្ងាត់គាំទ្រគម្រោងលើសពី ៨០% ដែលនេះគឺជាលទ្ធផលគួរជាទីមោទនៈ បង្ហាញឲ្យឃើញច្បាស់ថា ការអនុវត្តគម្រោងពិតជាមានប្រសិទ្ធិភាពក្នុងការលើកកំពស់ជីវភាពរស់នៅរបស់ប្រជាពលរដ្ឋមូលដ្ឋាន គោរពសិទ្ធិប្រពៃណី និងកម្មសិទ្ធិដីធ្លីប្រជាពលរដ្ឋ ព្រមទាំងផ្ដល់ការពារប្រកបដោយប្រសិទ្ធិភាពដល់ព្រៃឈើ ជីវចម្រុះ និងធនធានធម្មជាតិ នៃតំបន់ទេសភាពព្រៃរងទឹកភ្លៀងជួរភ្នំក្រវាញ ។កិច្ចប្រជុំលើកទី៨នេះ នឹងត្រូវអនុវត្តបន្ដទៅគ្រប់សហគមន៍គោលដៅទាំង ២៩ នៅក្នុងខេត្តចំនួនបីគឺខេត្តពោធិ៍សាត់ កោះកុង និងកំពង់ស្ពឺ ។

កញ្ញាបញ្ឌិត ស៊ូវណ្ណា ហ្គោនឡែត នាយិកាប្រតិបត្តិ អង្គការសម្ព័ន្ធមិត្តសត្វព្រៃ ដែលបានចូលរួមក្នុងកិច្ចប្រជុំនៅឆាយអារ៉ែងបានមានប្រសាសន៍ថា នាឆ្នាំ 2023 កន្លងទៅ កម្មវិធីអភិវឌ្ឍន៍និងផ្ដល់ជម្រើសជីវភាពដល់សហគមន៍របស់គម្រោងរេដបូកជួរភ្នំក្រវាញខាងត្បូងបានទទួលទឺកប្រាក់ចំនួន 2,045,733 ដុល្លា ស្មើនឹង 36% នៃថវិកាប្រចាំឆ្នាំរបស់គម្រោង ។ ថវិកាទាំងនេះបានបែងចែកដោយផ្ទាល់ទៅសហគមន៍តាមរយៈគណៈកម្មការគ្រប់គ្រងការចំណាយរបស់គម្រោងរេដបូក មានដូចជាការកសាងហេដ្ឋារចនាសម្ព័ន្ធ អណ្ដូងទឹក ផ្លូវថ្នល់ សាលារៀន អំពូលសូឡា និងអាហារូបករណ៍សម្រាប់សិស្សក្រីក្រឲ្យបានចូល រៀននៅថ្នាក់មហាវិទ្យាល័យនៅរាជធានីភ្នំពេញជាដើម ។ គម្រោងក៏បានផ្តល់ជំនួយហិរញ្ញវត្ថុដល់សកម្មភាពផ្សេងៗដែលជាប្រយោជន៍សម្រាប់ប្រជាពលរដ្ឋមូលដ្ឋានផងដែរ។

ជាក់ស្តែង គម្រោងបានផ្តល់ជូនប្រជាសហគមន៍ចំនួន ២១៥នាក់ នូវការងារពេញម៉ោង និងផ្តល់ជំនួយដល់ការផ្តួចផ្តើមបង្កើតគម្រោងសហគមន៍អេកូទេសចរណ៍ ដោយបានបង្កើតប្រាក់ចំណូលបានមួយលានដុល្លារសម្រាប់សហគមន៍បន្ថែមទៀត ចាប់តាំងពីគម្រោងបានចាប់ផ្តើម ។

ការលក់ឥណទានកាបូននៃគម្រោងរេដបូកជួរភ្នំក្រវាញខាងត្បូងបានដំណើរការតាំងពីឆ្នាំ ២០១៩ មកម្លេះ ដោយបានផ្តល់នូវអត្ថប្រយោជន៍ជាប្រាក់ចំណូលដល់រដ្ឋាភិបាល និងសហគមន៍ ហើយគម្រោងរេដបូកសំកុសនឹងបង្តើតប្រាក់ចំណូលបន្ថែមទៀតសម្រាប់ប្រទេសកម្ពុជា។ គម្រោងរេដបូកជួរភ្នំក្រវាញខាងត្បូង និងគម្រោងរេដបូកសំកុសមានក្រសួងបរិស្ថានជាម្ចាស់គម្រោង និងអង្គការសម្ព័ន្ធមិត្ដសត្វព្រៃ រួមជាមួយអាជ្ញាធរខេត្តនិងអាជ្ញាធរមូលដ្ឋានគ្រប់ជាន់ថ្នាក់ជាអ្នកអនុវត្តគម្រោង ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានមើលឃើញនូវសារសំខាន់នៃព្រៃឈើ និងជីវចម្រុះ ហើយបានអំពាវនាវ និងបានចេញបទបញ្ជាឲ្យមានការចូល រួមរក្សាអភិរក្សព្រៃឈើ និងធនធានធម្មជាតិនៅគ្រប់តំបន់ការពារធម្មជាតិទូទាំងប្រទេស ដើម្បីការលក់ឥណទានកាបូន និងអេកូទេសចរណ៍ ដែលនឹងនាំចំណូលសម្រាប់ប្រជាពលរដ្ឋមូលដ្ឋាន ៕ 

អត្ថបទ ៖ ភារម្យ