​​អាហ្វហ្គានីស្ថាន៖ ក្រុម​មន្ត្រី​បាន​និយាយ​កាលពី​ថ្ងៃ​ពុធ​ថា​ ក្រុម​តា​លី​បង់​បាន​ដណ្ដើម​កាន់កាប់​ខេត្ត​ចំនួន ៣​បន្ថែម​ទៀត​នៅ​ក្នុង​ប្រទេស​អា​ហ្វ​ហ្គា​នី​ស្ថាន និង​ទីស្នាក់ការ​កណ្ដាល​របស់​កង​ទ័ព​ក្នុង​តំបន់​មួយ​កន្លែង ដោយ​បាន​បញ្ចប់​ការ​វាយ​សម្រុក​ទៅមុខ​របស់​ពួកគេ ​នៅ​ទូទាំង​ភាគ​ឦសាន​ប្រទេស និង​បង្កើន​ការ​វាយ​លុក​នៅ​កន្លែង​ផ្សេងទៀត​។​

​ឥឡូវនេះ​ក្រុម​បះបោរ​បាន​គ្រប់គ្រង​ដែនដី​ពីរ​ភាគ​បី​នៃ​ប្រទេស​អា​ហ្វ​ហ្គា​នី​ស្ថាន ខណៈ​ដែល​សហរដ្ឋ​អាមេរិក​ និង​អង្គការ NATO បញ្ចប់​ការ​ដក​ទ័ព​របស់​ពួកគេបន្ទាប់ពី​សង្គ្រាម​រយៈពេល ​២​ទសវត្ស​នៅ​ទីនោះ​។​ ការ​ដួល​រលំ​នៃ​រដ្ឋធានី​របស់​ខេត្ត Badakhshan និង​ខេត្ត Baghlan ដល់​ភាគ​ឦសាន និង​ខេត្ត Farah រហូតដល់​ភាគ​ខាងលិច​ បាន​ដាក់​សម្ពាធ​កាន់​តែ​ខ្លាំង​លើ​រដ្ឋាភិបាល​កណ្តាល​រប​ស់​ប្រទេស​នេះ ​ដើម្បី​បញ្ឈប់​ការ​ការ​វាយ​សម្រុក​រុល​ទៅ​មុខ​ចេះតែ​កើន​ឡើង​ពី​សំណាក់​ពួក​តា​លី​បង់ បើ​ទោះ​បី​ជា​បាត់បង់​មូលដ្ឋាន​សំខាន់​នៅ​ទីក្រុង Kunduz ក៏ដោយ​។

​ប្រធានាធិបតី​អា​ហ្វ​ហ្គានី​ស្ថាន ​លោក Ashraf Ghani បាន​ប្រញាប់ប្រញាល់​ទៅកាន់​ខេត្ត Balkh ដែល​ជា​ដែនដី​ត្រូវ​បាន​គ្រប់គ្រង​ដោយ​ក្រុម​តា​លី​បង់ ដើម្បី​ស្វែងរក​ជំនួយ​ក្នុង​ការ​បណ្ដេញ​ក្រុម​បះបោរ​ពី​ពួក​មេដឹកនាំ​សង្គ្រាម ​ដែល​ជាប់​ពាក់ព័ន្ធ​នឹង​ការចោទប្រកាន់​ពី​អំពើ​ឃោរឃៅ ​និង​អំពើពុករលួយ​។ លោក​ក៏បាន​ដាក់​មនុស្ស​ថ្មី​ជំនួស​មេបញ្ជាការ​កងទ័ព​ចាស់​របស់​លោក​ដែរ​។​ ​នៅ​ទីក្រុង Farah ក្រុម​អ្នក​ប្រយុទ្ធ​តា​លី​បង់​បាន​អូស​សាកសព​ដែល​គ្មាន​ស្បែកជើង​ប្រឡាក់​ដោយ​ឈាម ​របស់​សមាជិក​កងក​ម្លាំ​ង​សន្តិសុខ​អា​ហ្វ​ហ្គា​នី​ស្ថាន​ម្នាក់​តាម​ដង​ផ្លូវ​ដោយ​ស្រែក​ថា ​“ព្រះ​ជា​ម្ចាស់​អស្ចារ្យ​”៕

អត្ថបទ៖ សុខមាន