ប្រធានាធិបតី លោក វ្ល៉ាឌីមៀ ពូទីន បាននិយាយកាលពីថ្ងៃសុក្រថា សេដ្ឋកិច្ចរបស់ប្រទេសរុស្ស៊ី កំពុង​រីកចម្រើន ទោះបីជាមានទណ្ឌកម្មពីអន្តរជាតិដ៏ខ្លាំងក្លាក៏ដោយ ហើយប្រទេសនេះ បាន​ពង្រីក​ទំនាក់ទំនងសេដ្ឋកិច្ចជាមួយបណ្តាប្រទេសនៅទ្វីបអាហ្រ្វិក មជ្ឈិមបូព៌ា និងទ្វីបអាស៊ី។

ថ្លែង​ទៅ​កាន់មេដឹកនាំប្រទេសបូលីវី ហ្ស៊ីមបាវ៉េ និងមេដឹកនាំ​ធុរកិច្ច​នៅ​ក្នុង​វេទិកា​សេដ្ឋកិច្ច​អន្តរជាតិ ទីក្រុង សេន ភីធឺស្បើក(St Petersburg) លោក Putin បាននិយាយថា ប្រទេសរុស្ស៊ី នៅ​តែ​ជាអ្នកចូលរួមមួយដ៏សំខាន់ នៅក្នុងពាណិជ្ជកម្មពិភពលោក ទោះ​បីជា​ការពិត​ដែល​ថា​ប្រទេស​នេះ​ស្ថិតនៅក្រោមការដាក់ទណ្ឌកម្ម សម្រាប់ការបញ្ជូនកងទ័ព ទៅកាន់ប្រទេស​អ៊ុយក្រែន​ក៏ដោយ។

វេទិកានេះ ត្រូវបានប្រើប្រាស់ដោយរុស្ស៊ីរយៈពេលជាច្រើនទសវត្សរ៍មកហើយ ជា​ការ​បង្ហាញ​ពី​ការ​អភិវឌ្ឍ​របស់ប្រទេស ទោះបីជាមន្ត្រី និងវិនិយោគិនប្រទេសលោកខាងលិច បានដឹកនាំ​កិច្ច​ប្រជុំ​ចាប់​តាំង​ពីការដាក់ទណ្ឌកម្ម ដែលបានកាត់ផ្តាច់ពាណិជ្ជកម្មជាច្រើនរបស់រុស្ស៊ី ជាមួយអឺរ៉ុប​ខាងលិច សហរដ្ឋអាមេរិក និងសម្ព័ន្ធមិត្ត របស់ពួកគេ ក៏ដោយ។

នៅក្នុង​កិច្ចប្រជុំ លោក ពូទីន បានព្រមានថា រុស្ស៊ីអាចផ្តល់​អាវុធ​រយៈ​ចម្ងាយ​ឆ្ងាយ​ដល់​ប្រទេស​ដទៃ ដើម្បីវាយប្រហារគោលដៅប្រទេសលោកខាងលិច ក្នុង​ការឆ្លើយតប​ទៅនឹង​សម្ព័ន្ធ​មិត្ត នៃ​សម្ព័ន្ធ​យោធាណាតូ ដែលអនុញ្ញាតឱ្យអ៊ុយក្រែនប្រើប្រាស់អាវុធវាយប្រហារលើទឹកដីរុស្ស៊ី។

លោក បានបញ្ជាក់សារជាថ្មី អំពីការត្រៀមខ្លួនរបស់ទីក្រុងមូស្គូ ក្នុងការប្រើប្រាស់អាវុធនុយក្លេអ៊ែរ ប្រសិន​បើប្រទេសនេះ មើលឃើញការគំរាមកំហែងដល់ដែនអធិបតេយ្យភាពរបស់ខ្លួន៕