កងកម្លាំងអ៊ីស្រាអែល បានទម្លាក់គ្រាប់បែកលើជំរំជនភៀសខ្លួននៅតំបន់ហ្កាហ្សា កាលពីថ្ងៃសុក្រ បន្ទាប់ពីការវាយប្រហារបណ្តាលឲ្យមានមនុស្សស្លាប់ច្រើនទៅលើសាលារៀនមួយកន្លែងរបស់អង្គការសហប្រជាជាតិនៅទីនោះ ខណៈសង្រ្គាមបង្កឡើងដោយការវាយប្រហារ​មិនធ្លាប់មាន​ពីមុន​មក​របស់​ក្រុមហាម៉ាស លើអ៊ីស្រាអែល បានឈានចូលដល់ខែទីប្រាំបួន។

កិច្ចខិតខំប្រឹងប្រែងដើម្បីសម្របសម្រួលឲ្យមានបទឈប់បាញ់លើកដំបូងនៅក្នុងជម្លោះបង្ហូរឈាមចាប់​តាំងពីការផ្អាករយៈពេលមួយសប្តាហ៍ កាលពីខែវិច្ឆិកាកន្លងទៅ ទំនងជានៅជាប់គាំង បន្ទាប់​ពី​ប្រធានាធិបតីសហរដ្ឋអាមេរិក លោក Joe Biden បានផ្តល់ផែនទីបង្ហាញផ្លូវថ្មី។ ក្រុមហាម៉ាស នៅ​មិនទាន់ឆ្លើយតបទៅនឹងសំណើរបស់លោក Biden នៅឡើយទេ ខណៈអ៊ីស្រាអែល បាន​បង្ហាញ​ការ​បើកចំហ ចំពោះកិច្ចពិភាក្សា ប៉ុន្តែនៅតែ​ប្តេជ្ញាចិត្ត​ក្នុង​ការ​បំផ្លាញ​ក្រុម​សកម្ម​ប្រយុទ្ធ​ហាម៉ាស ប៉ាឡេស្ទីន។

ក្រសួងការបរទេសបាននិយាយថា នៅក្នុងការជំរុញផ្នែកការទូតថ្មី រដ្ឋមន្ត្រីការបរទេស​សហរដ្ឋ​អាមេរិក លោក Antony Blinken នឹងទៅធ្វើទស្សនកិច្ចនៅប្រទេសអ៊ីស្រាអែល និង​ដៃគូ​ប្រចាំ​តំបន់សំខាន់ៗ មានប្រទេសអេហ្ស៊ីប ហ្ស៊កដានី និងប្រទេសកាតា ចាប់ពីថ្ងៃច័ន្ទ ក្នុង​ដំណើរ​ទស្សន​កិច្ចនៅតំបន់មជ្ឈិមបូព៌ាលើកទីប្រាំបី ចាប់តាំងពីសង្រ្គាម បានចាប់ផ្តើម។

ខណៈ​តំបន់ហ្កាហ្សា ប្រឈមមុខទៅនឹងការវាយប្រហាររបស់អ៊ីស្រាអែល ពីដីគោក សមុទ្រ និង​តាម​អាកាស កាលពីថ្ងៃសុក្រ សាក្សីបាននិយាយថាជំរំ Nuseirat ក្នុងតំបន់ហ្កាហ្សាភាគកណ្តាល បាន​រងការវាយប្រហារជាថ្មីម្តងទៀត មួយថ្ងៃបន្ទាប់ពីការវាយប្រហាររបស់អ៊ីស្រាអែល លើ​សាលារៀន​មួយកន្លែងដំណើរការដោយអង្គការសហប្រជាជាតិ។

វេជ្ជ​បណ្ឌិត​មន្ទីរពេទ្យ Al-Aqsa Martyrs នៅជិតទីក្រុង Deir al-Balah បាននិយាយថា មនុស្ស​យ៉ាង​ហោច​ណាស់៤០នាក់ ត្រូវបានសម្លាប់​នៅ​ក្នុង​ការ​វាយ​ប្រហារ​តាម​អាកាសកា​ល​ពី​ថ្ងៃ​ព្រហស្បតិ៍ ដែលយោធាអ៊ីស្រាអែល បាននិយាយថាបានដាក់គោលដៅទៅលើក្រុមភេរវជន កំពុង​លាក់​ខ្លួន​នៅក្នុងបន្ទប់រៀនចំនួន៣៕