ភ្លៀងធ្លាក់ខ្លាំង នៅថ្ងៃសៅរ៍ (ទី៨ ខែមិថុនា) នេះ បានបង្កឲ្យមានជាទឹកជំនន់យ៉ាងគំហុកភ្លាមៗ នៅ​ក្នុងទីក្រុងធំជាងគេរបស់អូស្ត្រាលី គឺស៊ីដនី ដែលជំរុញឲ្យមានការជួយសង្គ្រោះ និងបញ្ជា​ជម្លៀស​ចេញ សម្រាប់តំបន់ទំនាបនៅជាយក្រុងមួយចំនួន។

អាជ្ញាធរគ្រាអាសន្នបានឲ្យដឹងថា ពួកគេបានជួយសង្គ្រោះមនុស្សចំនួន ១៣នាក់ និងបាន​ទទួល​ការ​ហៅ​ទូរសព្ទសុំជំនួយចំនួន ២៩៧ដង ពីអ្នកស្រុកនៅក្នុងទីក្រុងស៊ីដនី ដែលជារដ្ឋធានីរបស់រដ្ឋ New South Wales ក្នុងរយៈពេល ២៤ម៉ោង ពោលគឺរហូតដល់ម៉ោង ៥ព្រឹក (ម៉ោងក្នុងស្រុក) ដោយ​សារតែមានទឹកជំនន់ដែលបង្កឡើងដោយភ្លៀងធ្លាក់ខ្លាំង។

អ្នកព្យាករណ៍អាកាសធាតុរបស់ប្រទេសនេះ បានព្រមានថា ទឹកជំនន់ធំអាចកើតឡើង នៅ​ភាគ​ពាយព្យ​នៃ​ទីក្រុងស៊ីដនី ជាទីក្រុងដែលមានប្រជាជនប្រហែល ៥លាននាក់ នៅយប់ថ្ងៃសៅរ៍នេះ។

គួរបញ្ជាក់ថា ទឹកជំនន់ គឺជាប្រភេទ​គ្រោះមហន្ត​រាយធម្មជាតិ​ដែលមា​ន​មនុស្ស​ស្លាប់​ច្រើន​ជាង​គេទី​២ បន្ទាប់ពីរលកកម្ដៅ ក្នុងប្រទេសអូស្ត្រាលី ដែលមានចំនួនប្រហែល ២០​ភាគរយ​នៃ​ការ​ស្លាប់​ដោយ​គ្រោះធម្មជាតិ រវាងឆ្នាំ១៩០០ និងឆ្នាំ២០២២។ នេះបើយោងតាម​ទីភ្នាក់ងារ​សេវា​កម្ម​អាកាស​ធាតុ​របស់រដ្ឋាភិបាលសហព័ន្ធអូស្ត្រាលី៕