ប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃសុក្រ (ទី៧ ខែមិថុនា) បាននិយាយថា ប្រទេស​របស់លោកបានត្រៀមខ្លួនរួចរាល់ហើយ ដើម្បីបន្តការចរចា ស្ដីពីបញ្ហាអ៊ុយក្រែន ប៉ុន្តែ​ការ​ចរចា​នោះគួរតែផ្អែកលើកិច្ចព្រមព្រៀងដែលបានបង្កើតឡើងពីពេលមុន នៅទីក្រុង Minsk របស់​ប្រទេស​បេឡារុស និងទីក្រុង Istanbul របស់ប្រទេសទួរគី ក៏ដូចជាផ្អែក​លើ​ស្ថានភាព​ពិត​បច្ចុប្បន្ន​ផងដែរ​។

ខណៈដែលឆ្លើយសំណួររបស់អ្នកសារព័ត៌មាន នៅក្នុងសម័យ​ប្រជុំ​ពេញអង្គ​នៃ​សន្និសីទ​សេដ្ឋកិច្ច​អន្តរជាតិ St. Petersburg លើកទី២៧ លោក ពូទីន បានបញ្ជាក់ថា៖ «ជម្លោះប្រដាប់​អាវុធ​ទាំងអស់ នឹងបញ្ចប់ដោយកិច្ចព្រមព្រៀងសន្តិភាព។ រុស្ស៊ីគ្មានបំណង​ចង់​ធ្វើ​សង្គ្រាម​ជាមួយ​អ្នក​ណា​ទាំងអស់ ហើយអ្វីដែលរុស្ស៊ី ត្រូវការគឺសម្រេចបាននូវកិច្ចព្រមព្រៀងអាចទុកចិត្តបាន ដែល​ស្ថិត​នៅ​ក្នុងប្រយោជន៍ដោយផ្ទាល់របស់កិច្ចព្រមព្រៀងនោះ»។

នៅពេលនិយាយអំពីប្រទេសលោកខាងលិច ដែលជួយផ្ដល់​ឲ្យ​អ៊ុយក្រែន​នូវ​អាវុធ​ដែល​កំណត់គោ​ល​ដៅ​យ៉ាងជាក់លាក់រយៈចម្ងាយឆ្ងាយ និងអនុញ្ញាតឲ្យអ៊ុយក្រែនប្រើប្រាស់អាវុធទាំងនោះ ដើម្បី​វាយ​ប្រហារលើដែនដីរបស់រុស្ស៊ី លោក ពូទីន បានប្រាប់ថា រុស្ស៊ីមានសិទ្ធិក្នុងការឆ្លើយតប និង​ផ្តល់​អាវុធរយៈចម្ងាយឆ្ងាយទៅកាន់ផ្នែកផ្សេងទៀតនៃពិភពលោក ប៉ុន្តែរុស្ស៊ី​មិនទាន់​ធ្វើ​ដូច្នេះ​នៅ​ឡើយ​ទេ ហើយក៏មិនមានបំណងធ្វើបែបនោះភ្លាមៗដែរ។

លោក ពូទីន បានបញ្ជាក់បន្ថែមថា គោលដៅទាំងអស់នៃប្រតិបត្តិការយោធាពិសេសរបស់រុស្ស៊ី នឹង​ត្រូវសម្រេចបាន ហើយអាចនឹងបង្កើនល្បឿនប្រតិបត្តិការយោធាពិសេស ប៉ុន្តែ​ការ​ធ្វើ​បែប​នេះ​នឹង​នាំ​ឲ្យមានការខាតបង់បន្ថែមទៀត។ ការចំណាយផ្នែកយោធារបស់រុស្ស៊ី ត្រូវតែធ្វើ​ឡើង​ឲ្យ​ស្រប​តាម​តម្រូវ​ការបច្ចុប្បន្ន និងកម្រិតអភិវឌ្ឍន៍សេដ្ឋកិច្ច៕