ថ្មីៗបន្ទាប់ពីពិធីរំលឹកខួបលើកទី៨០ នៃទិវាជ័យជម្នះឡើងដល់ដីគោក ឬ D-Day ក្នុង​សម័យ​សង្គ្រាម​លោក លើកទី២ ប្រធានាធិបតីបារាំងលោក Emmanuel Macron នឹងធ្វើជាម្ចាស់ផ្ទះ​ទទួលស្វាគមន៍​ប្រធានាធិបតីអាមេរិកលោក Joe Biden នៅថ្ងៃសោរ៍ (ទី៨ ខែមិថុនា) នេះ សម្រាប់​ដំណើរទស្សនកិច្ចផ្លូវរដ្ឋ ដែលត្រូវបានធ្វើឡើងដោយមានទិដ្ឋភាពដ៏រីករាយ និង​ព្យុហយាត្រា ក៏ដូចជាកិច្ចពិភាក្សា ស្តីពីពាណិជ្ជកម្ម ហើយនិងបញ្ហាអ៊ីស្រាអែល និងអ៊ុយក្រែន។

មេដឹកនាំទាំង ២រូប ដែលបង្ហាញនូវទំនាក់ទំនងយ៉ាងកក់ក្តៅ ទោះបីជាមានភាពតានតឹងកន្លងមក ជុំវិញ​កិច្ចព្រមព្រៀងនាវាមុជទឹកជាមួយអូស្ត្រាលីក៏ដោយ នឹងចូលរួមក្នុ​ង​ពិធី​ស្វាគមន៍​ជាមួយ​ភរិយា​របស់​ពួកគេ នៅឯវិមានជ័យជម្នះ Arc de Triomphe និងព្យុហយាត្រា តាមមហាវិថី Avenue des Champs-Elysees មុនពេលបើកកិច្ចប្រជុំអំពីគោលនយោបាយផ្សេងៗ ហើយបន្ទាប់មកចូលរួមអាហារពេលល្ងាច។ លោក Biden បានធ្វើជាម្ចាស់ផ្ទះទទួលលោក Macron សម្រាប់ដំណើរទស្សនកិច្ចផ្លូវរដ្ឋ នៅសេតវិមាន ក្នុងឆ្នាំ២០២២។

មុនជំនួប រវាងមេដឹកនាំទាំង២ ទីប្រឹក្សាសន្តិសុខជាតិអាមេរិក លោក Jake Sullivan បាន​ប្រាប់​អ្នក​យកព័ត៌មាន កាលពីដើមសប្តាហ៍នេះថា៖ «បារាំងគឺ​ជាសម្ព័ន្ធ​មិត្ត​ដ៏​មាន​វ័យចំណាស់បំ​ផុត​របស់​យើង ហើយជាសម្ព័ន្ធមិត្តមួយ ក្នុងចំណោមសម្ព័ន្ធមិត្តដ៏ស៊ីជ្រៅបំផុតរបស់យើង។ ហើយ​នេះ​នឹង​ក្លាយ​ជាពេលវេលាដ៏សំខាន់មួយ ដើម្បីបញ្ជាក់ពីសម្ព័ន្ធភាពនោះ ហើយក៏​សម្លឹង​មើល​ទៅ​អនាគត និងអ្វីដែលយើងត្រូវសម្រេចរួមគ្នាផងដែរ»។

ជាមួយគ្នានេះ គេរំពឹងថា លោក Biden និងលោក Macron ក៏នឹងពិភាក្សាផងដែរ អំពី​ការ​ពង្រឹង​អង្គការ​ណាតូ (NATO) ហើយមេដឹកនាំទាំង២ បានសន្យាគាំទ្រដល់អ៊ុយក្រែន ទោះបីជា​ប្រទេស​ទាំង​២ មិនទាន់បានយល់ព្រមលើផែនការប្រើប្រាស់ទ្រព្យសម្បត្តិរបស់រុស្ស៊ី ដែលត្រូវបានបង្កក ដើម្បី​ជួយដល់ទីក្រុងគីវក៏ដោយ៕