សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បាន​អញ្ជើញ​ដឹក​នាំកិច្ចប្រជុំគណៈកម្មាធិការគណបក្សខេត្តប្រចាំខែឧសភា ឆ្នាំ២០២៤ និងលើក​ទិសដៅ​អនុវត្ត​បន្ត និងបូក សរុបដកពិសោធន៍ការងារបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក​អាណត្តិទី៤ ឆ្នាំ២០២៤ នៅថ្ងៃទី៨ ខែមិថុនា នេះ ។

សម្តេចកិត្តិសង្គហបណ្ឌិត ម៉ែន សំអន បានសំដែងនូវការកោតសរសើរ និងការវាយតម្លៃ ខ្ពស់ចំ ពោះ​ថ្នាក់ដឹកនាំ មន្ត្រីរាជការ បុគ្គលិក កងកម្លាំង និងក្រុមការងាររាជរដ្ឋាភិបាល ក្រុម​ការងារ​គណបក្ស ចុះមូលដ្ឋានគ្រប់លំដាប់ថ្នាក់នៃខេត្តស្វាយរៀង ដែល​បានខិតខំ​ប្រឹងប្រែង​រួមគ្នា​យ៉ាង​សកម្ម ក្នុងការបំពេញ តួនាទី ភារកិច្ចប្រកបដោយស្មារតីទទួលខុសត្រូវខ្ពស់ ដើម្បី​សម្រេច​បាន​នូវ​សមិទ្ធផល​ក្នុង​ការធានាថែរក្សា សុខសន្តិភាព ស្ថិរភាពនយោបាយ ការរក្សាសន្តិសុខ សណ្តាប់​ធ្នាប់​សាធារណៈ ការលើកកម្ពស់លទ្ធិប្រជា ធិបតេយ្យ និងជំរុញការអភិវឌ្ឍសេដ្ឋកិច្ច-សង្គម ស្រប​តាម​គោល​នយោបាយរបស់រាជរដ្ឋាភិបាល សំដៅ លើកកម្ពស់ជីវភាពរស់នៅ និងបន្តកាត់​បន្ថយ​ភាព​ក្រីក្រ​របស់ប្រជាពលរដ្ឋ និងថ្លែងអំណរគុណផងដែរ ចំពោះម្ចាស់បោះឆ្នោត ដែលបាន​បន្ត​គាំទ្រ និងបោះឆ្នោតជូនគណបក្សប្រជាជន រហូតទទួលបានជោគ ជ័យ ក្នុង​ការ​បោះឆ្នោត​ជ្រើស​រើស​ក្រុម​ប្រឹក្សាខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤នេះ ។

សម្តេចកិត្តិសង្គហបណ្ឌិត បានផ្តល់នូវគោលការណ៍ណែនាំសំខាន់ៗសម្រាប់អនុវត្តបន្តចំនួន៣ចំ ណុច រួមមាន ទី១. ការពង្រឹងសន្តិភាព ស្ថិរភាពនយោបាយ និងសន្តិសុខ សណ្តាប់​ធ្នាប់​សាធារណៈ និង ត្រូវរួមគ្នាបន្តការគាំទ្រគម្រោងអភិវឌ្ឍន៍ព្រែព្រែកជីកហ្វូណនតេជោ ជាសមិទ្ធ​ផល​ប្រវត្តិសាស្រ្តថ្មីរបស់ គណបក្សដែលនឹងបើកការដ្ឋានស្ថាបនានៅថ្ងៃទី០៥ ខែសីហា ខាង​មុខនេះ ទី២. គណបក្សគ្រប់ថ្នាក់ ត្រូវ បន្តយកចិត្តទុក្ខដាក់លើការពង្រឹងរចនាសម្ព័ន្ធ និង​របៀប​របប​ធ្វើការងារ ទី៣. គណបក្សគ្រប់ថ្នាក់ ត្រូវចាត់ តាំងអនុវត្តឲ្យបានជោគជ័យ និងល្អ​ប្រសើរ​តាម​ផែន​ការ​ណែនាំលេខ ០០២/០៥២៤/សណ.គក ចុះថ្ងៃ ទី៣១ ខែឧសភា ឆ្នាំ២០២៤ របស់​គណៈ​អចិន្ត្រៃយ៍ គណៈកម្មការកណ្តាល ស្តីពីការចាត់តាំងខួបលើក ទី៧៣ ថ្ងៃបង្កើត​គណបក្ស​ប្រជាជន​កម្ពុជា ២៨ មិថុនា ១៩៥១ - ២៨ មិថុនា ២០២៤ ៕ អត្ថបទ៖ ភា សារិទ្ធ