សម័យប្រជុំលើកទី៧៨ នៃមហាសន្និបាតអង្គការសហប្រជាជាតិ (UNGA) កាលពីថ្ងៃសុក្រ (ទី៧ ខែមិថុនា) បានអនុម័តជាឯកច្ឆ័ន្ទនូវសេចក្ដីសម្រេចដែលស្នើឡើងដោយប្រទេសចិន ដើម្បីឲ្យបង្កើតទិវាអន្តរជាតិសម្រាប់ការសន្ទនា ក្នុងចំណោមអរិយធម៌នានា។

សេចក្តីសម្រេចចែងថា សមិទ្ធផលអរិយធម៌ទាំងអស់ គឺជា «មរតករួមរបស់មនុស្សជាតិ»។ សេចក្ដីសម្រេចគាំទ្រការគោរពដល់ភាពចម្រុះនៃអរិយធម៌ ដោយសង្កត់ធ្ងន់លើ «តួនាទីដ៏សំខាន់នៃការសន្ទនា» ក្នុងចំណោមអរិយធម៌នានា ដើម្បីរក្សាសន្តិភាពពិភពលោក ធ្វើឲ្យការអភិវឌ្ឍរួមកាន់តែប្រសើរឡើង លើកកម្ពស់សុខុមាលភាពមនុស្ស និងសម្រេចបាននូវវឌ្ឍនភាពរួម។

ជាមួយគ្នានេះ សេចក្ដីសម្រេចនេះអំពាវនាវឲ្យមាន «ការសន្ទនាស្មើភាពគ្នា និងការគោរពគ្នាទៅវិញទៅមក» ក្នុងចំណោមអរិយធម៌ផ្សេងៗគ្នា ដែលឆ្លុះបញ្ចាំងយ៉ាងពេញលេញនូវខ្លឹមសារស្នូលនៃគំនិតផ្តួចផ្តើមអរិយធម៌សកល។ ហើយសេចក្ដីសម្រេចនេះកំណត់យកថ្ងៃទី១០ ខែមិថុនា ជាទិវាអន្តរជាតិ សម្រាប់ការសន្ទនា ក្នុងចំណោមអរិយធម៌នានា។

លោក Fu Cong តំណាងអចិន្ត្រៃយ៍របស់ចិនប្រចាំអង្គការសហប្រជាជាតិ (UN) បានដាក់បង្ហាញនូវសេចក្តីសម្រេចព្រាងនេះ នៅសម័យប្រជុំពេញអង្គរបស់ UNGA ដោយបញ្ជាក់ថា ក្នុងបរិបទបច្ចុប្បន្ននៃវិបត្តិ និងបញ្ហាប្រឈមជាច្រើនដែលជាប់ទាក់ទងគ្នានោះ ពិភពលោកបានឈានចូលដល់សម័យកាលថ្មីនៃការមានអស្ថិរភាព និងការផ្លាស់ប្តូរ ដោយធ្វើឲ្យសង្គមមនុស្សស្ថិតនៅផ្លូវបំបែកនៃប្រវត្តិសាស្ត្រជាថ្មីម្ដងទៀត។

លោក Fu បានប្រាប់ថា៖ «ប្រឆាំងនឹងទិដ្ឋភាពនេះ ប្រទេសចិនបានស្នើឲ្យបង្កើតទិវាអន្តរជាតិ សម្រាប់ការសន្ទនា ក្នុងចំណោមអរិយធម៌នានា ដែលនឹងទាញយកប្រយោជន៍យ៉ាងពេញលេញពីសារៈសំខាន់នៃកិច្ចសន្ទនាអរិយធម៌ ដើម្បីលុបបំបាត់ការរើសអើង និងភាពអគតិ បង្កើនការយល់ដឹង និងការជឿទុកចិត្ត លើកកម្ពស់ទំនាក់ទំនង រវាងប្រជាជន និងប្រជាជន ហើយនិងការពង្រឹងសាមគ្គីភាព និងកិច្ចសហប្រតិបត្តិការ។ គំនិតផ្តួចផ្តើមនេះ បញ្ចូលនូវថាមពលវិជ្ជមានទៅក្នុងកិច្ចខិតខំប្រឹងប្រែងជាសកល ដើម្បីដោះស្រាយបញ្ហាប្រឈមរួម»៕