ការិយាល័យរបស់លោកស្រី Mette Frederiksen នៅថ្ងៃសៅរ៍ (ទី៨ ខែមិថុនា) នេះ បានឲ្យ​ដឹង​នៅ​ក្នុងសេចក្តីថ្លែងការណ៍ថា នាយករដ្ឋមន្ត្រីនៃប្រទេសដាណឺម៉ាករូបនេះ បានរង​របួស​ស្រាល​ត្រង់ក បន្ទាប់ពីលោកស្រីត្រូវបានវាយប្រហារដោយបុរសម្នាក់ នៅកណ្តាលទីក្រុង Copenhagen កាល​ពីថ្ងៃសុក្រ (ទី៧ ខែមិថុនា)។

អមដោយការបន្ថែមថា លោកស្រី Frederiksen ត្រូវបានបញ្ជូន​ទៅ​មន្ទីរពេទ្យ ដើម្បី​ពិនិត្យ​បន្ទាប់​ពី​មាន​ឧបទ្ទវហេតុ កាលពីល្ងាចថ្ងៃទី៧ ខែមិថុនា សេចក្ដីថ្លែងការណ៍នោះ បានបញ្ជាក់ថា៖ «ក្រៅ​ពី​នោះ លោកស្រីនាយករដ្ឋមន្រ្តី មានសុវត្ថិភាពធម្មតា ប៉ុន្តែលោកស្រីមានអារម្មណ៍តក់ស្លុត ចំពោះ​ឧបទ្ទវហេតុនេះ»។

ជាមួយគ្នានេះ ការិយាល័យរបស់លោកស្រី បានបន្ថែមថា រាល់កម្មវិធីផ្លូវការរបស់នាយករដ្ឋមន្ត្រី នៅ​ថ្ងៃទី៨ ខែមិថុនានេះ ត្រូវបានលុបចោលទាំងអស់។

ចំណែក​នគរបាលដាណឺម៉ាក នៅថ្ងៃទី ៨ ខែមិថុនា បានប្រាប់ថា បុរសវ័យ ៣៩ឆ្នាំម្នាក់ នឹងត្រូវ​បង្ហាញ​ខ្លួន នៅចំពោះមុខចៅក្រម ដើម្បីផ្ដល់ចម្លើយពីការសាកសួរបឋម ពាក់ព័ន្ធនឹង​ការ​វាយ​ដំលើ​រូបនាយករដ្ឋមន្ត្រី។ ហើយនគរបាលបានបន្ថែមថា បុរសនេះ​នឹង​ត្រូវ​បាននាំ​ខ្លួន​ទៅ​កាន់​តុលាការ​ទីក្រុង Copenhagen ដើម្បីសាកសួរ នៅម៉ោងប្រហែល ១រសៀល (ម៉ោងក្នុងស្រុក) ប៉ុន្តែ​បានបដិសេធមិនផ្តល់ព័ត៌មានលម្អិតបន្ថែមឡើយ។

យ៉ាងណាក្ដី ទាំងនគរបាល និងការិយាល័យរបស់នាយករដ្ឋមន្ត្រី មិនបាននិយាយថា តើអ្វី​ជា​ហេតុ​ផល​របស់​បុរសនោះ ឬថា តើរូបគេកាន់អាវុធប្រភេទអ្វី ដើម្បីវាយប្រហារ។ ការវាយ​ប្រហារ​នេះ​កើត​ឡើង​ ២ថ្ងៃ មុនពេលដែលប្រជាជនដាណឺម៉ាក ចេញទៅបោះឆ្នោត នៅក្នុង​ការ​បោះឆ្នោត​សហភាព​អឺរ៉ុ​ប៕