សៀមរាប៖ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា បានអញ្ជើញជាអធិបតីក្នុងកម្មវិធី «JCI Senate Golden Era Night» នៃមហាសន្និបាតតំបន់អាស៊ី និងប៉ាស៊ីហ្វិកឆ្នាំ២០២៤ នៅសណ្ឋាគារសុខាអង្គរ ខេត្តសៀមរាប កាលពីល្ងាចថ្ងៃទី៨ ខែមិថុនា ឆ្នាំ២០២៤។

ក្នុងអង្គពិធី ឯកឧត្តមឧបនាយករដ្ឋមន្រ្តី បានថ្លែងអំណរគុណដល់ប្រមុខ​រាជរដ្ឋាភិបាលកម្ពុជា​អាណត្តិទី៧ ដែលបានអនុញ្ញាតឱ្យកម្មវិធីនេះបានរៀបចំឡើងនៅលើទឹកដីនៃខេត្តសៀមរាប ព្រមទាំងបានវាយតម្លៃខ្ពស់ចំពោះ JCI កម្ពុជា ​អាជ្ញាធរមូលដ្ឋាន ​សហភាពសហព័ន្ធយុវជនកម្ពុជា និងយុវជនស្ម័គ្រចិត្តនៃក្រុមគ្រួសារ ស.ស.យ.ក.ទាំងអស់ដែលបានលះបង់កម្លាំងកាយចិត្តរៀបចំ និងចូលរួមជួយជ្រោមជ្រែងកម្មវិធីដ៏មានសារៈសំខាន់នេះ​ ឱ្យប្រព្រឹត្តទៅដោយរលូន និងជោគជ័យ។

តាមរយៈការរៀបចំនូវ JCI ASPAC Angkor Cambodia ឆ្នាំ 2024 ឯកឧត្តម បានគូសបញ្ជាក់ថា មិន​ត្រឹមតែ​អនុញ្ញាតឱ្យអ្នកចូលរួមមកពីបណ្តាប្រទេសនានា មកប្រទេសកម្ពុជាអាចស្វែងយល់​ពីភាព​សម្បូរបែបនៃវប្បធម៌ ​និងភាពកក់ក្តៅ ស្នាមញឹមរបស់ប្រជាជនកម្ពុជាប៉ុណ្ណោះទេ ប៉ុន្តែគ្រប់គ្នាៗ បានមកជាសាក្សីនៃការរីកចម្រើនរបស់សង្គម ការរស់នៅ ​និងសមិទ្ធិផលរបស់កម្ពុជាក្នុងរយៈពេល ៤៥ ឆ្នាំកន្លងមកនេះ ទាំងក្នុងដំណាក់កាលការតស៊ូនាអតីតកាល ការអភិវឌ្ឍ​ឥតឈប់ឈរក្នុង​ពេលបច្ចុប្បន្ន ​និងការបោះជំហានឆ្ពោះទៅមុខប្រកបដោយភាពជឿជាក់ និងសក្តានុពលរបស់​ព្រះរាជាណាចក្រ​កម្ពុជា។

ទន្ទឹមនេះ ឯកឧត្តមក៏បានរំលេចអនុសាសន៍សម្តេចធិបតីអំពីដំណើរដែលកម្ពុជា​បានឆ្លងកាត់​ពីប្រទេស​ដែលធ្លាប់តែត្រូវ​បាន​ស្គាល់ដោយសង្គ្រាម និងវាលពិឃាត ទៅជាប្រទេសដែលមាន​សន្តិភាព​ពេញលេញ និងការទទួលស្គាល់ ក្នុងគោលដៅដើម្បីរម្លឹកពីតម្លៃនៃសុខសន្តិភាព​ដែល​មិនអាចកាត់ថ្លៃ​បានសម្រាប់មនុស្សជាតិទូទាំងពិភពលោក។

សូម​ជម្រាបដែរថា​កម្មវិធី «JCI Senate Golden Era Night» បានរៀបចំឡើងក្នុងគោលបំណង​អប​អរសាទរ ​និង​ប្រកាសផ្ទេរតំណែងជូនប្រធានប្តូរវេន ព្រមទាំងទទួលស្គាល់ក្រុមប្រឹក្សាភិបាល​របស់​ព្រឹទ្ធសមាជិកJCI ក៏ដូចជាបង្កើនភាព​ស្និតស្នាល​តាមរយៈការ​រៀបចំ​កម្មវិធីពិសារ​ភោជនីអាហារ​អបអរ​បញ្ចប់​អាណត្តិ ​និងសមិទ្ធផលរបស់ប្រធាន រួមទាំង​ក្រុមប្រឹក្សាភិបាលអាណត្តិ ឆ្នាំ២០២៣ផងដែរ៕