នគរបាលបាននិយាយថា យ៉ាងហោចណាស់មនុស្ស៩នាក់បានស្លាប់ និង៣៣នាក់ បានរងរបួស នៅពេលដែលរថយន្តក្រុងមួយគ្រឿងដឹកអ្នកធ្វើធម្មយាត្រាសាសនាហិណ្ឌូ បានធ្លាក់ចូលទៅក្នុងជ្រលងជ្រោះជ្រៅមួយកន្លែង បន្ទាប់ពីមានការវាយប្រហាររបស់ក្រុមសកម្មប្រយុទ្ធដែលសង្ស័យ នៅក្នុងដែនដីសហព័ន្ធឥណ្ឌាតំបន់ ជេមមូ(Jammu) និងតំបន់កាស្មៀ(Kashmir) កាលពីថ្ងៃអាទិត្យ។

តំបន់ភ្នំហិម៉ាឡៃ ដែលត្រូវបានអះអាងសិទ្ធដោយប្រទេសប៉ាគីស្ថានផងដែរនោះ បានកើតមានអំពើហិង្សារបស់ក្រុមសកម្មប្រយុទ្ធ ចាប់តាំងពីការចាប់ផ្តើមនៃការបះបោរប្រឆាំងប្រទេសឥណ្ឌាក្នុងឆ្នាំ១៩៨៩។ មនុស្សរាប់ម៉ឺននាក់ត្រូវបានសម្លាប់ ទោះបីជាអំពើហិង្សា បានថយចុះក្នុងរយៈពេលប៉ុន្មានឆ្នាំចុងក្រោយនេះក៏ដោយ។

លោកស្រី Mohita Sharma អធិការនគរបាលស្រុក Reasi បាននិយាយថា ក្រុមសកម្មប្រយុទ្ធ បានពួនស្ទាក់វាយប្រហារលើរថយន្តក្រុង ហើយបានបាញ់ទៅលើរថយន្តដឹកអ្នកដំណើរដោយមិនរើសមុខ។ រថយន្តក្រុង បានធ្លាក់ចូលទៅក្នុងជ្រលងជ្រោះជ្រៅ បណ្តាលឱ្យអ្នកធ្វើធម្មយាត្រា ៩នាក់ស្លាប់ និង៣៣ នាក់បានរងរបួស។ ការវាយប្រហារទ្រង់ទ្រាយធំចុងក្រោយ ទៅលើអ្នកធ្វើធម្មយាត្រាសាសនាហិណ្ឌូនៅក្នុងតំបន់នេះ បានកើតឡើងកាលពីឆ្នាំ២០១៧ ដែលនៅពេលនោះ រថយន្តក្រុងមួយគ្រឿង ត្រូវបានគេដាក់គោលដៅ បណ្តាលឲ្យមនុស្សប្រាំបីនាក់ស្លាប់។

នគបាល បាននិយាយនៅក្នុងសេចក្តីថ្លែងការណ៍ថា ការវាយប្រហារ កាលពីថ្ងៃអាទិត្យ ទី៩ ខែមិថុនា កើតឡើងមួយថ្ងៃបន្ទាប់ពីនាយនគរបាលម្នាក់ បាននិយាយថា ចំនួនក្រុមសកម្មប្រយុទ្ធក្នុងតំបន់ នៅក្នុងដែនដីនេះកំពុងថយចុះ ប៉ុន្តែជនសកម្មប្រយុទ្ធបរទេស ៧០ ទៅ៨០នាក់ នៅតែមានសកម្មភាពយ៉ាងសកម្ម។ អ្នករងរបួស ត្រូវបានបញ្ជូនទៅកាន់មន្ទីរពេទ្យដែលនៅក្បែរនោះ ហើយការស្វែងរកអ្នកវាយប្រហារកំពុងត្រូវបានធ្វើឡើង។