គ្រឹះស្ថានសិក្សាបន្តអនុវត្តខ្ជាប់ខ្ជួន លើវិធានការគ្រប់គ្រង ហាមប្រាម​សិស្ស​មិន​ឱ្យជក់​បារី​អេឡិច​ត្រូនិក​ជា​ដាច់ខាត។ សាលារៀននីមួយៗ មានវិធានការរៀងខ្លួនលើការងារនេះ។ សម្រាប់​វិទ្យាល័យ ហ៊ុន សែន សេរីភាព នៅក្រុងតាខ្មៅ គឺអនុវត្តដោយចុះឆែកឆេរសិស្សដល់ថ្នាក់រៀន ដក​ហូត និងអញ្ជើញអាណាព្យាបាលមកធ្វើកិច្ចសន្យាបើសិនជាពិនិត្យឃើញសិស្សនោះប្រើប្រាស់ បារី​អេឡិច​ត្រូនិក។

គ្រឹះស្ថានសិក្សានីមួយៗ បន្តយកចិត្តទុកដាក់លើការគ្រប់គ្រង ហាម​ប្រាម​សិស្ស​មិន​ឱ្យ​ជក់​បារី​អេឡិច​ត្រូនិក​។ ការដាក់ចេញវិធានការ របស់គ្រឹះស្ថានសិក្សា មានភាពផ្សេងគ្នា ទៅតាមគណៈ​គ្រប់​សាលា​នីមួយៗ។ អ្វីដែលសង្កេតឃើញ គឺជាការផ្សព្វផ្សាយអប់រំជាប្រចាំ ពីផលប៉ះ​ពាល់​សុខភាព នៃ​ការប្រើប្រាស់បារីអេឡិចត្រូនិក។

វិទ្យាល័យ ហ៊ុនសែន សេរីភាព ក្នុងភូមិសាស្ត្រក្រុងតាខ្មៅ ខេត្តកណ្ដាល ក៏បាន ជ្រើសរើស​វិធាន​ការ​ចុះ​ឆែកឆេរដល់ថ្នាក់រៀន ពិនិត្យមើលកាតាបសិក្សារបស់សិស្ស ស្វែងរកបារីអេឡិចត្រូនិក និង​សម្ភារ​ហាមឃាត់ដទៃទៀត។ ការចុះពិនិត្យដល់ថ្នាក់រៀននេះ ធ្វើឡើងជាសម្ងាត់ ដោយមិន​អនុញ្ញាត​ឱ្យ​សិស្សដឹងមុនជាដាច់ខាត។ លោក សេង ស្រឿន នាយករងនៃវិទ្យាល័យ ហ៊ុនសែន សេរីភាព លើកឡើងថា ការងារនេះអនុវត្តជាប្រចាំជាច្រើនឆ្នាំមកហើយ។ កន្លងទៅ គណៈ​គ្រប់​គ្រង​សាលា​ចុះឆែកឆេរ ដោយដកហូតបានបារីអេឡិចត្រូនិក ពីសិស្សប្រុស និងសិស្សស្រីផងដែរ ហើយ​ក៏មានការអញ្ជើញអាណាព្យាបាលមកធ្វើកិច្ចសន្យាដោយផ្ទាល់។

បណ្ដាសិស្សានុសិស្សលើកឡើងថា កន្លងទៅពួកគេសុទ្ធតែធ្លាប់ឃើញ សិស្ស​លួច​ជក់​បារី​អេឡិច​ត្រូនិក​។ សិស្សខ្លះលួចជក់ ក្នុងសាលា សិស្សខ្លះលួចជក់ក្រៅសាលា ដោយមានទាំងសិស្សប្រុស និង​សិស្ស​ស្រីផងដែរ។ ពួកគេសង្កេតឃើញថា បច្ចុប្បន្នសកម្មភាពខុសឆ្គងនេះ មានការកាត់​បន្ថយ​ច្រើន ស្របពេលដែលគណៈគ្រប់គ្រងសាលាអនុវត្តវិធានការតឹងរឹង ជាប្រចាំ។ ពួក​គេ​គាំទ្រ​នូវ​ចំណាត់ការ ដែលសាលាបានដាក់ចេញ ហើយពួកគេសំណូមពរ ឱ្យសិស្សឈប់​ប្រើប្រាស់​បារី​អេឡិច​ត្រូនិក ព្រោះវាមានតែបំផ្លាញសុខភាព។

សូមជម្រាបថា ថ្មីៗនេះ ក្រសួងអប់រំ យុវជន និងកីឡា ក៏បានចេញសេចក្ដីណែនាំបន្ថែម ស្ដីពី​ការ​ទប់​ស្កាត់​ការប្រើប្រាស់បារីអេឡិចត្រូនិក និងផលិតផល អេចឆ៍ ធី ភី (HTPs) នៅក្នុងនិងជុំវិញ បរិវេណ​គ្រឹះស្ថានសិក្សាសាធារណៈនិងឯកជន៕ អត្ថបទ៖ គឹមហុក