គិតរហូតមកដល់បច្ចុប្បន្ននេះ មូលដ្ឋានសុខាភិបាល​ដែលបាន​ចុះកិច្ចព្រមព្រៀង សម្រាប់​របប​ថែ​ទាំ​សុខភាពបេឡាជាតិរបបសន្តិសុខសង្គម (ប.ស.ស) សរុបចំនួន ១,៥៥០ មូលដ្ឋានក្នុង​នោះ​មានដូចជា មន្ទីរពេទ្យថ្នាក់ជាតិចំនួន ១១ , មន្ទីរពេទ្យបង្អែក ១២៤ , មណ្ឌលសុខភាព ១,២៧៨ , និងមន្ទីរពេទ្យឯកជន ចំនួន ១៣៧។

ឯកឧត្តមបណ្ឌិត ហេង សុផាន់ណារិទ្ធ អគ្គនាយករង បេឡាជាតិសន្តិសុខសង្គម នៃ​ក្រសួងការងារ និង​បណ្តុះ​បណ្តាលវិជ្ជាជីវៈ បានមានប្រសាសន៍ប្រាប់ព័ត៌មាន ប៊ីធីវី ឲ្យដឹងថា គិតត្រឹមថ្ងៃទី១០ ខែ​មិថុនា ឆ្នាំ២០២៤នេះ សមាជិករបស់បេឡាជាតិសន្តិសុខសង្គមសរុបមានចំនួនជាង ២,២​លាន​នាក់ ក្នុងនោះបុគ្គលស្វ័យនិយោជន៍មានចំនួនជាង ២០ម៉ឺននាក់។ ឯកឧត្តមបានបន្តថា ទៅ​ថ្ងៃ​អនាគត​ខាងមុខ ប.ស.ស. នឹងពិនិត្យមើលលទ្ធភាពបន្ត ថាតើនៅបណ្តុំដែលមានសមាជិក ប.ស.ស. មានមូលដ្ឋានសុខាភិបាលដែលបានចុះកិច្ចព្រមព្រៀងជាមួយ ប.ស.ស. ដែរឬទេ ប្រសិន​ក្នុង​ករណីដែលមូលដ្ឋានសុខាភិបាលដែលចុះកិច្ចព្រមព្រៀងជាមួយ ប.ស.ស. នៅឆ្ងាយ គឺ​នឹង​អាច​ពិនិត្យលទ្ធភាពរកមូលដ្ឋានដែលនៅក្បែរៗសមាជិក ប.ស.ស. ដើម្បីបន្ត​កិច្ច​សហការ​ដើម្បី​ងាយ​ស្រួលដល់ការប្រើប្រាស់សេវាបន្ថែមទៀត។

ជាមួយនេះ ឯកឧត្តមបណ្ឌិត បានអំពាវនាវសាធារណជនទាំងអស់ឲ្យបង្កើនការប្រុង​ប្រយ័ត្ន​ខ្ពស់​អំពី​ការ​ឆបោករបស់ជនខិលខូចមួយចំនួន ខណៈថ្មីៗនេះ មានជនអនាមិកបានបន្លំខ្លួនជាមន្រ្តី ប.ស.ស. ដោយប្រើប្រាស់រូបថត និងនិមិត្តសញ្ញា ប.ស.ស. ទាក់ទងទៅកាន់​សមាជិក​ដោយ​ផ្ទាល់​ដោយ​ភ្ជាប់​នូវលេខគណនីធនាគារក្លែងរបស់ ប.ស.ស. និងផ្ញើរ ឃ្យូអរកូដ (QR Code) ផ្ទេរ​ប្រាក់​ក្លែង​ក្លាយដែលនាំឲ្យមានការភ័ណ្ឌច្រឡំ និងធ្វើឲ្យខាតបង់ថវិកាសមាជិក ប.ស.ស. ដែល​ត្រូវ​បង់​ភាគ​ទាន​របបសន្តិសុខសង្គមមកបេឡាជាតិសុខសង្គម។

ពាក់ព័ន្ធបណ្ណ ប.ស.ស. ក្រុមប្រជាពលរដ្ឋមកពីតំបន់ខុសៗគ្នា បានឲ្យ ប៊ីធីវី ដឹងថា បណ្ណនេះ ពិត​ជា​ផ្តល់​អត្ថប្រយោជន៍ច្រើន និងមានសារសំខាន់ខ្លាំងណាស់ ជាពិសេស​នៅ​ពេល​មាន​បញ្ហា​សុខភាព តម្រូវឲ្យសម្រាកព្យាបាលនៅក្នុងមន្ទីរពេទ្យ ដោយលែង​មាន​ការ​បារម្ភ​អំពី​ការ​ចំណាយ​ប្រាក់​កាក់​ច្រើន​។ ក្រុមប្រជាពលរដ្ឋ ក៏បានសម្តែងការអរគុណដល់រាជរដ្ឋាភិបាលកម្ពុជា ដែល​តែង​តែ​គិតគូរ​សុខទុក្ខប្រជាពលរដ្ឋគ្រប់ស្រទាប់វណ្ណៈ។

សូមបញ្ជាក់ថា គិតចាប់ពីថ្ងៃអនុវត្ត ឆ្នាំ២០០៨ រហូតត្រឹមបំណាច់ខែឧសភា ឆ្នាំ២០២៤នេះ បេឡាជាតិ​សន្តិសុខសង្គម (ប.ស.ស.) នៃក្រសួងការងារនិងបណ្តុះបណ្តាលវិជ្ជាជីវៈ បាន​ចំណាយ​ប្រាក់​ប្រមាណជាង ដល់សមាជិក ប.ស.ស. ចំនួនជាង ១២០លានដុល្លារអាម៉េរិក សម្រាប់​ការ​ព្យាបាលជំងឺ និងអត្ថប្រយោជន៍ផ្សេងៗទៀតសម្រាប់វិស័យសាធារណ និង​វិស័យ​ឯកជន​។ ដោយឡែក សម្រាប់បុគ្គលស្វ័យនិយោជន៍ និងអ្នកនៅក្នុងបន្ទុកសមាជិក ប.ស.ស. គិត​ចាប់​ពី​ខែ​កក្កដា ឆ្នាំ២០២៣ រហូតត្រឹមបំណាច់ខែឧសភា ឆ្នាំ២០២៤ បានចំណាយ​ប្រាក់​ប្រមាណ​ជិត ៣លានដុល្លារអាម៉េរិក សម្រាប់ការព្យាបាលជំងឺ និងអត្ថប្រយោជន៍ផ្សេងៗ៕ អត្ថបទ ឈិត បូរ៉ាវី