ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច និងជាប្រធាន ក្រុមប្រឹក្សាសកម្មភាពជនពិការ គ្រោង​នឹងធ្វើសេចក្តីថ្លែងការណ៍ស្ដីពីជោគជ័យលើការងារពិការភាពរបស់កម្ពុជា ក្នុងសន្និសីទ​ លើកទី១៧ របស់រដ្ឋភាគី នៃអនុសញ្ញាស្តីពីសិទ្ធិជនពិការ នៅការិយាល័យកណ្តាល នៃ​អង្គការ​សហ​ប្រជាជាតិ ទីក្រុងញូវយ៉ក សហរដ្ឋអាមេរិក នាថ្ងៃទី១១-១៣ ខែមិថុនា ឆ្នាំ២០២៤នេះ។

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតសម្បទា និង​ជា​ប្រធាន​ក្រុម​ប្រឹក្សា​សកម្មភាពជនពិការកាលពីរសៀលថ្ងៃទី៩ ខែមិថុនា ឆ្នាំ ២០២៤ បានដឹកនាំ​គណៈ​ប្រតិភូ​កម្ពុជា​មានចំនួន១១រូប ទៅចូលរួមសន្និសីទ លើកទី១៧ របស់រដ្ឋភាគី នៃ​អនុសញ្ញា​ស្តីពី​សិទ្ធិជនពិការ។

សន្និសីទនេះធ្វើឡើងក្រោមប្រធានបទរួមគឺ «ការពិចារណាឡើងវិញអំពីការបរិយាបន្ន ពិការភាព​នៅ​ក្នុង​វេទិកាអន្តរជាតិបច្ចុប្បន្ននិងមុនកិច្ចប្រជុំកំពូលក្នុងពេលអនាគត”។ សន្និសីទនេះ នឹង​មាន​ប្រធាន​បទ​ជាក់លាក់ ចំនួន៣ថែមទៀតគឺ កិច្ចសហប្រតិបត្តិការអន្តរជាតិ ដើម្បីលើក​កម្ពស់​នវានុវត្តន៍ និងការផ្ទេរបច្ចេកវិទ្យា ជនមានពិការភាពក្នុងស្ថានភាពហានិភ័យ និងគ្រោះអាសន្ន​ផ្នែក​មនុស្សធម៌ និងលើកកម្ពស់សិទ្ធិជនមាន ពិការភាពឱ្យមានការងារសមរម្យ និងជីវភាព​រស់​នៅ​ប្រកប​ដោយ​និរន្តរភាព។

ដើម្បីឆ្លើយតបទៅនឹងប្រធានបទរួម និងប្រធានបទជាក់លាក់សម្រាប់សន្និសីទ លើកទី១៧ នៃ​រដ្ឋភាគី​ អនុសញ្ញាស្តីពីសិទ្ធិជនពិការ ប្រធានគណៈប្រតិភូឯកឧត្តម ជា សុមេធី នឹង​ធ្វើ​សេចក្តី​ថ្លែងការណ៍ ដើម្បី​បង្ហាញអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលបាន និង​កំពុង​យកចិត្ត ទុកដាក់គិតគូរ និងផ្តល់​អាទិភាព​ចំពោះ​ជនមាន​ពិការ​ភាព​តាម​រយៈ​ការ​ងារ​បរិយាបន្ន​ពិការភាព​, ការងារ កិច្ចសហប្រតិបត្តិការ​អន្តរជាតិ ដើម្បី​លើក​កម្ពស់​នវានុវត្តន៍ និង​ការ​ផ្ទេរ​បច្ចេក​វិទ្យា, ការជួយដោះស្រាយជនមាន ពិការភាព ក្នុងស្ថានភាពហានិភ័យ និង​គ្រោះអា​សន្ន​ផ្នែក​មនុស្ស​ធម៌​, និងការលើកកម្ពស់សិទ្ធិ មានការងារ សមរម្យ និងជីវភាព​រស់នៅ​ប្រកប​ដោយ​និរន្តរភាព​។

គួរបញ្ជាក់ថា កម្ពុជាបានផ្តល់សច្ចាប័នអនុសញ្ញាស្តីពីសិទ្ធិជនពិការហើយក្លាយជារដ្ឋ ភាគី​នៅ​ឆ្នាំ​២០១៣ ដោយគិតត្រឹមខែឧសភា ឆ្នាំ២០២៤ នេះមានប្រទេសចំនួន១៩១ បានផ្តល់សច្ចាប័ន និង​មាន​ប្រទេសចំនួន១៦៤បានចុះហត្ថលេខាលើអនុសញ្ញាស្តីពី សិទ្ធិជនពិការ​របស់​អង្គការ​សហ​ប្រជាជាតិនេះ​។ ក្នុងរយៈពេល៣ថ្ងៃនេះ ប្រតិភូក៏នឹងចូលរួមកិច្ច ប្រជុំ និងកិច្ចសន្ទនាតុ​មូល​ក៏ដូច​ជា​ការ​ចែករំលែករបស់ប្រទេសនានាអំពីវឌ្ឍនភាពនៃការអនុវត្តអនុសញ្ញា ស្តីពីសិទ្ធិជនពិការ​ដោយ​ផ្តោត​លើ​ប្រធាន​បទខាងលើ៕ អត្ថបទ៖ គឹម ហុក