ឯកឧត្តម ទេសរដ្ឋមន្រី្ត អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានកោតសរសើរដល់ក្រសួងក្រសួងសង្គមកិច្ច អតីតយុទ្ធជន និងយុវនីតិសម្បទា ប្រឹងប្រែងចូលរួមក្នុងការអនុវត្តការឆ្លើយតបនឹងមេរោគអេដស៍ រហូតឈានសម្រេចបាននូវគោលដៅចំនួន២ ក្នុងចំណោមគោលដៅ ៩៥ទាំងបី តាមរយៈផ្តល់នូវការគាំទ្រផ្នែកគាំពារសង្គម ផ្សព្វផ្សាយពីការឆ្លើយតប នឹងមេរោគអេដស៍ទៅក្នុងទាំងផ្នែកជាតិ និងឯកជន។
ការថ្លែងរបស់ឯកឧត្តមទេសរដ្ឋមន្រី្ត អៀង មូលី យ៉ាងដូច្នេះ ក្នុងកិច្ចប្រជុំ ស្តីពីការឆ្លើយតបនឹងមេរោគអេដស៍ និងជំងឺអេដស៍ ក្នុងវិស័យសង្គមកិច្ច។ កិច្ចប្រជុំត្រូវបានអញ្ជើញចូលរួមពីឯកឧត្តម សុខ ប៊ុនថា រដ្ឋលេខាធិការ និងជាប្រធានគណៈកម្មាធិការប្រយុទ្ធ នឹងជំងឺអេដស៍ក្រសួងសង្គមកិច្ច អតីតយុទ្ធជន និងយុវនីតិសម្បទា នាព្រឹកថ្ងៃទី១០ ខែមិថុនា ឆ្នាំ២០២៤នេះ។
ឯកឧត្តមទេសរដ្ឋមន្រ្តី បានបញ្ជាក់ពីតួនាទីភារកិច្ចរបស់អាជ្ញាធរជាតិប្រយុទ្ធនឹងជំងឺអេដស៍ ស្របតាមអនុក្រឹត្យលេខ ១០៩ ផងដែរ។ ក្នុងឱកាសនោះ ឯកឧត្តមទេសរដ្ឋមន្រ្តី ក៏បានផ្តល់នូវមតិសំណេះសំណាល និងអនុសាសន៍ដល់កិច្ចប្រជុំដូចខាងក្រោម៖ សមិទ្ធផលបានកន្លងមកដូចជា៖ ៣/៥ ក្នុងឆ្នាំ២០០៥ MDG ក្នុងឆ្នាំ២០១០ គោលដៅ៩០-៩០-៩០ ក្នុងឆ្នាំ២០១៧ ព្រមទាំងការសម្រេចបាននូវ ៨៦-៩៩-៩៨ (គោលដៅ៩៥-៩៥-៩៥) ក្នុងឆ្នាំ២០២២។ ចំណែកការព្យាបាលលើអ្នកផ្ទុកមេរោគអេដស៍បានប្រមាណជា ៦៨៥០០នាក់ រហូតដល់ចុងឆ្នាំ២០២៣នេះ។ យើងនឹងសម្រេចជោគជ័យ តាមន័យវិទ្យាសាស្រ្ត គឺត្រូវបញ្ចុះអ្នកឆ្លងថ្មីត្រឹម ១០ភាគរយនៃអ្នកឆ្លងថ្មីក្នុងឆ្នាំ២០១០ មានន័យថាអ្នកឆ្លងថ្មីត្រូវមានប្រមាណជា ២០០នាក់ក្នុងមួយឆ្នាំ។ ការស្រឡាញ់ភេទដូចគ្នា មិនបង្កឱ្យឆ្លងមេរោគអេដស៍ទេ តែការរួមភេទដោយមិនមានវិធានការបង្ការទើបជាបញ្ហា។ រាជរដ្ឋាភិបាល បានផ្តល់ថ្នាំប្រឆាំងមេរោគអេដស៍ដោយឥតគិតថ្លៃដល់អ្នកផ្ទុកមេរោគអេដស៍ និងផ្តល់បណ្ណមូលនិធិសមធម៌ដល់អ្នកផ្ទុកមេរោគអេដស៍។ បើទោះបីជា កម្ពុជា មានភាពប្រសើរក្នុងការឆ្លើយតបនឹងមេរោគអេដស៍ និងការមាក់ងាយ និងរើសអើងត្រូវបានកាត់បន្ថយក៏ដោយ ក៏ការមាក់ងាយនិងរើសអើងនៅតែមាននៅឡើយ ដូច្នេះក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវចូលរួមជួយផ្សព្វផ្សាយ។ ពិភាក្សានូវវិធានការនានា នៃគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ ដែលរួមមាន៖ ពង្រឹងប្រព័ន្ធឆ្លើយតបជាពហុវិស័យ (៥វិធានការ) ពង្រីក ពង្រឹង និងពន្លឿនកម្មវិធីបង្ការ (៩វិធានការ) ពង្រីក ពង្រឹង និងពន្លឿនកម្មវិធីថែទាំ និងព្យាបាល (៧វិធានការ) ពង្រីក ពង្រឹង និងពន្លឿនកម្មវិធីគាំពារសង្គម (៣វិធានការ) បញ្ចប់ការរើសអើង និងមាក់ងាយ (៣វិធានការ) ចលនាធនធាន (៤វិធានការ) ពង្រឹងប្រសិទ្ធភាពប្រព័ន្ធតាមដាន និងវាយតម្លៃ (៨វិធានការ) ដែលក្នុងនោះមានវិធានចំនួន ១០ នៃគោលនយោបាយជាតិនេះ មានទាក់ទងនឹងវិស័យសង្គមកិច្ច អតីតយុទ្ធជន និងយុវនីតិសម្បទា។
ជាបន្តឯកឧត្តម សុខ ប៊ុនថា រដ្ឋលេខាធិការ បានបញ្ជាក់ថា គណៈកម្មាធិការប្រយុទ្ធនឹងជំងឺអេដស៍ក្រសួងសង្គមកិច្ច អតីតយុទ្ធជន និងយុវនីតិសម្បទា ត្រូវបានប្រកាសកាលពីថ្ងៃទី២៩ ខែឧសភា ឆ្នាំ២០២៤ ព្រមទាំងបានបង្កើតនូវផែនការយុទ្ធសាស្រ្តឆ្លើយតបនឹងមេរោគអេដស៍ និងជំងឺអេដស៍ សម្រាប់វិស័យសង្គមកិច្ច រួចរាល់ ដោយបានកំណត់នូវយុទ្ធសាស្រ្តចំនួន៥ ដើម្បីចូលរួមឆ្លើយតបមេរោគអេដស៍ និងជំងឺអេដស៍ សម្រាប់ឆ្នាំ ២០២៣-២០២៨៕ អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
