នៅព្រឹកថ្ងៃទី១០ ខែមិថុនា ឆ្នាំ២០២៤ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និង​នេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បាន​អញ្ជើញ​ជា​អធិបតីក្នុងពិធីប្រកាសចូលកាន់តំណែងក្រុមប្រឹក្សាខេត្តបន្ទាយមានជ័យ អាណត្តិទី៤ នៅ​សាលប្រជុំធំ សាលាខេត្តបន្ទាយមានជ័យ។

ឆ្លើយតបទៅនឹងសេចក្តីប្រកាស ឯកឧត្ដម ប្លែក វ៉ារី ប្រធានក្រុមប្រឹក្សា អាណត្តិ ទី៣ និង​បន្ត​ដឹកនាំ​នៅ​អាណត្តិទី៤ថ្មី បានប្តេជ្ញា​គោរព និង​អនុវត្តតាមកម្មវិធីនយោបាយ និង​យុទ្ធសាស្ត្រ​បញ្ចកោណ ដំណាក់កាល- ទី១ របស់រាជរដ្ឋាភិបាលអាណត្តិទី៧ នៃរដ្ឋសភា ក្រោមការ​ដឹកនាំ​ប្រកប​ដោយ​កិត្តិបណ្ឌិត សម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណា​ចក្រ​កម្ពុជា ដើម្បីកំណើនការងារ សមធម៌ ប្រសិទ្ធភាព និងចីរភាព។ ដោយប្រតិបត្តិ​ដោយ​ភក្ដីភាព​ស្ម័គ្រ​ស្មោះចំពោះរាជរដ្ឋាភិបាល និងប្រជាជន ក្នុងដែនសមត្ថកិច្ចរបស់ខ្លួន និងរួម​ចំណែក​ពង្រឹង​រដ្ឋបាលឯកភាពខេត្ត ដើម្បីម្ចាស់ការ និងការទទួលខុសត្រូវ ក្នុងការ​គ្រប់គ្រង​ចាត់​ចែង​អនុវត្ត​មុខងារ ជាកាតព្វកិច្ច មុខងារជាជម្រើស និងធនធាននានា ទាំងខាង បញ្ញត្តិ និងខាង​ប្រតិបត្តិ សំដៅលើកកម្ពស់សមត្ថភាព និងការអភិវឌ្ឍស្ថាប័ន ព្រមទាំងការផ្តល់សេវារដ្ឋបាល សេវា​សាធារណៈជូនប្រជាពលរដ្ឋឱ្យឆាប់រហ័សទាន់ពេលវេលា មានតម្លាភាព គណនេយ្យ- ភាព សង្គតិភាព សមធម៌ និងបរិយាបន្ន។

ថ្លែងទៅកាន់អង្គពិធី ឯកឧត្តមរដ្ឋមន្ត្រី បានសម្ដែងសេចក្តីសោមនស្សរីករាយ និង​អបអរ​សាទរ​ដល់​​ក្រុម​ប្រឹក្សាចំនួន ២៥រូប ដែលត្រូវប្រកាសចូលកាន់តំណែង។ ជាមួយគ្នានេះដែរ ឯកឧត្តម​រដ្ឋមន្ត្រី បានគូសបញ្ជាក់អំពីគោលដៅរួមគ្នា ក្នុងការផ្តល់សេវាសាធារណៈ ធានា​សន្តិសុខ​សុវត្ថិភាព​ លើកកម្ពស់ជីវភាពប្រជាពលរដ្ឋ និងកាត់បន្ថយភាពក្រីក្រ ស្រប​តាម​យុទ្ធ​សាស្ត្រ​បញ្ចកោណ។​ បើតាមឯកឧត្តមរដ្ឋមន្ដ្រី ដើម្បីសម្រេចការងារបាម ស្ថាប័ន និង​អាជ្ញាធរ​ពាក់ព័ន្ធ​ទាំង​អស់​ត្រូវ​សហការល្អ ធ្វើការជាមួយគ្នាប្រកបដោយទទួលខុសត្រូវខ្ពស់ និងមានភាពម្ចាស់ការ។

ឯកឧត្តមរដ្ឋមន្ត្រី បានផ្ដល់អ​នុសាសន៍​ដល់​ក្រុម​ប្រឹក្សា​ត្រូវ​ធ្វើ​ការ​ជាមួយ​អភិបាល​ខេត្ត​ថ្មី​ឱ្យ​បាន​ជិត​ស្និទ្ធ ទាន់ពេល ត្រូវមានរបបប្រជុំតាមការកំណត់ និងត្រូវ​បំពេញ​កាត​ព្វកិច្ច​ស្រប​តាម​នីតិ​វិធី​ច្បាប់​ជា​ធរមាន។

លើសពីនេះទៀត ឯកឧត្តមរដ្ឋមន្ត្រី បានបញ្ជាក់បន្ថែមថា ក្រុម​ប្រឹក្សា​ខេត្ត​ត្រូវ​ប្រជុំ​រៀបចំ​ផែនការ​អភិវឌ្ឍខេត្ត ដាក់ចេញកម្មវិធីកំណែទម្រង់នានាស្របតាមគោលនយោបាយរបស់រាជរដ្ឋាភិបាល ពិនិត្យ​ការផ្តល់សេវាសាធារណៈជូនដល់ប្រជាពលរដ្ឋឱ្យកាន់តែខិតជិតនិងកាន់តែប្រសើរ ព្រម​ទាំង​ធានា​គ្រប់គ្រងសន្តិសុខសុវត្ថិភាពមូលដ្ឋាន និងចុះមូលដ្ឋានផ្ទាល់ ដើម្បី​ដឹងពី​សុខទុក្ខ និង​ដោះ​ស្រាយ​បញ្ហាជូនពលរដ្ឋឱ្យបានទាន់ពេលវេលា និងមានប្រសិទ្ធភាព៕ អត្ថបទ រឿង ចន្ទ្រា