ភ្នំពេញ ៖ ទន្ទឹមនឹងរដូវវស្សាបានចូលមកដល់ ក្រុមមន្ត្រីអាជ្ញាធរ និងជំនាញ បានបន្តពង្រឹងលើកិច្ចការងារចុះស្តារ និងកាយ រាល់ប្រឡាយមេធំៗ និងសម្ខាន់ជាច្រើន នៅរាជធានីភ្នំពេញ ដើម្បីបើកមុខប្រឡាយឱ្យធំ ងាយក្នុងការបង្ហូរ ឬរំដោះទឹក បញ្ចៀសការជន់លិច ។ 

ក្រុមមន្ត្រីជំនាញ នៃមន្ទីរសាធារណះការ និងដឹកជញ្ចូនរាជធានីភ្នំពេញ សហការជាមួយសហការជាមួយមូលដ្ឋាន បានដាក់គ្រឿងចក្រជាច្រើនគ្រឿងចុះកាយស្តារសំរាម និងកាកសំណល់ ចេញពីបាតផ្ទៃប្រឡាយទឹកបឹងទំពន់ ដើម្បីអាចធ្វើឱ្យប្រព័ន្ធបង្ហូរទឹកមេដ៏ធំមួយនេះ អាចហូរទឹកបានដោយរលូន មិនបង្កការរាំងស្ទះដល់ចរន្តទឹក នៅពេលមានភ្លៀងធ្លាក់ខ្លាំងម្តងៗ ។ 

ការកាយ និងស្តាររបស់មន្ត្រីជំនាញនៅពេលនេះ គឺជាការជួយរំដោះទឹកបានមួយផ្នែកធំ ពីតំបន់នៅប៉ែកខាងលើ ព្រោះប្រឡាយទឹកបឹងទំពន់ គឺត្រូវទទួលរងការហូរទឹកធ្លាក់ពីតំបន់ខណ្ឌមួយចំនួន នៅក្នុងរាជធានីភ្នំពេញ ចូលមកប្រឡាយនេះ និងបន្តហូរធ្លាក់ទៅអាងស្តុកទឹកបឹងទំពន់ ។ 

ក្រុមមន្ត្រីជំនាញ បានប្រាប់ឱ្យដឹងថា ៖ ដំបូងឡើយ គឺត្រូវកាយសំរាម ឬកំផ្លោកដែលមាននៅលើផ្ទៃប្រលាយចេញឱ្យអស់សិន បន្ទាប់មក គឺត្រូវប្រើអេស្កាវ៉ាទ័រ ដើម្បីកាយកាកសំណល់ ឬភក់នៅបាតប្រលាយ ដើម្បីជីកជម្រៅទៅខាងក្រោមឱ្យដល់បាត ដែលមានជម្រៅប្រមាណ៤ម៉ែត្រ ទៅក្រោម ។ 

ការធ្វើបែបនេះ គឺដើម្បីបើកមុខផ្ទៃប្រលាយឱ្យបានធំ និងធ្វើឱ្យជម្រៅប្រលាយជ្រៅ ដើម្បីអាចស្តុកទឹកក្នុងបរិមាទឹកច្រើន ដូច្នោះហើយពេលមានភ្លៀងធ្លាក់ខ្លាំង ឬត្រូវទទួលរងទឹកហូរធ្លាក់ពីតំបន់ប៉ែកខាងលើមកខ្លាំងយ៉ាងណាក៏ដោយ ក៏ទឹកអាហូរបានដោយរលូន មិនបង្កការរាំងស្ទះចរន្តទឹកហូរ ឬបង្កការលិចលង់ប៉ះពាល់ដល់ប្រជាពលរដ្ឋនោះឡើយ ។ 

ប្រជាពលរដ្ឋរស់នៅតំបន់ក្បែរប្រឡាយទឹកបឹងទំពន់ បានបង្ហាញការសប្បាយចិត្ត ចំពោះការយកចិត្តទុកដាក់គិតគូររបស់ក្រុមអាជ្ញាធរ ក្នុងការចុះកាយ និងស្តារប្រលាយទឹក ដើម្បីរំដោះទឹក បញ្ចៀសការជន់លិច និងដើម្បីសោភ័ណ្ឌភាពផងដែរ ។ 

ពលរដ្ឋក្បែរតំបន់ និងពលរដ្ឋអ្នកដំណើរ បានបង្ហាញការយល់ឃើញថា ៖ ការធ្វើឱ្យផ្ទៃប្រលាយបង្ហូរទឹក អាចស្អាត និងមានសោភ័ណ្ឌភាពទៅបាន គឺប្រាស្រ័យទៅលើការចូលរួមថែទាំដោយចាប់ផ្តើមពីយើងទាំងអស់គ្នា ពិសេសអ្នករស់នៅប្របសងខាងប្រឡាយ គឺត្រូវរក្សាឱ្យបាននូវបរិស្ថានអនាម័យ លើការវេចខ្ចប់ និងទុកដាក់សំរាមឱ្យបានត្រឹមត្រូវ ជៀសវៀវការបោះចោលសំរាម ឬកាកសំណល់សេសសល់ពីការប្រើប្រាស់ប្រចាំថ្ងៃចូលទៅក្នុងផ្ទៃប្រឡាយ ដែលជាហេតុធ្វើំឱ្យចរន្តទឹកមិនអាចហូរបានលឿន ហើយនាំឱ្យខូចបរិស្ថានសង្គមជាតិផងដែរ ។ 

សូមបញ្ជាក់ថា ប្រឡាយបង្ហូរទឹកបឹងទំពន់ គឺជាប្រឡាយមេដ៏ធំមួយ ក្នុងចំណោមប្រលាយមេសំខាន់ជាច្រើនទៀត ក្នុងក្របខណ្ឌរាជធានីភ្នំពេញ ដែលប្រឡាយនេះ មានប្រវែងប្រមាណ៤គីឡូម៉ែត្រ លាតសន្ធឹងចាប់ពីស្ពានអាកាសស្ទឹងមានជ័យ រហូតដល់ស្ថាននីយ៍ប៊ូមទឹកបឹងទំពន់ ៣៧១ ក្នុងភូមិសាស្ត្រខណ្ឌមានជ័យ រាជធានីភ្នំពេញ ៕ 

អត្ថបទ ៖ លីហេង