រដ្ឋមន្ត្រីអ៊ីស្រាអែល លោក Benny Gantz បានប្រកាសលាលែងពីតំណែងពីរដ្ឋាភិបាលគ្រាអាសន្នរបស់នាយករដ្ឋមន្ត្រី លោក Benjamin Netanyahu កាលពីថ្ងៃអាទិត្យ (ទី៩ ខែមិថុនា) ដោយធ្វើឲ្យបាត់បង់អំណាចរបស់អ្នកកណ្ដាលនិយម ដែលមានតែមួយគត់ នៅក្នុងរដ្ឋាភិបាលចម្រុះស្តាំនិយមរបស់មេដឹកនាំដែលកំពុងជួបការលំបាក អំឡុងពេលមានសង្រ្គាមអូសបន្លាយជាច្រើនខែ នៅតំបន់ហ្កាហ្សា។

ការចាកចេញរបស់គណបក្សកណ្តាលនិយមរបស់លោក Gantz នេះ នឹងមិនបង្កការគំរាមកំហែងភ្លាមៗដល់រដ្ឋាភិបាលនោះឡើយ។ ប៉ុន្តែវាអាចមានផលប៉ះពាល់យ៉ាងធ្ងន់ធ្ងរ ដោយធ្វើឲ្យលោក Netanyahu ពឹងផ្អែកលើក្រុមរឹងរូស ដោយគ្មានសញ្ញាបញ្ចប់សង្រ្គាម នៅតំបន់ហ្កាហ្សា និងការរីករាលដាលដែលអាចកើតមាន នៅក្នុងការប្រយុទ្ធ ជាមួយក្រុម Hezbollah របស់លីបង់។

កាលពីខែមុន លោក Gantz បានបង្ហាញជូនលោក Netanyahu ដោយកំណត់យកថ្ងៃទី៨ ខែមិថុនា ដើម្បីឲ្យបង្ហាញនូវយុទ្ធសាស្ត្រច្បាស់លាស់មួយ សម្រាប់តំបន់ហ្កាហ្សា ដែលអ៊ីស្រាអែល បាន និងកំពុងធ្វើការវាយលុកផ្នែកយោធា ប្រឆាំងនឹងក្រុមសកម្មប្រយុទ្ធហាម៉ាសប៉ាឡេស្ទីន ដែលកំពុងកាន់អំណាច។ តែលោក Netanyahu បានច្រានចោលឱសានវាទនោះភ្លាមៗ បន្ទាប់ពីត្រូវបានផ្តល់មក។

ជាមួយនឹងការចាកចេញរបស់លោក Gantz លោក Netanyahu នឹងបាត់បង់ការគាំទ្រពីប្លុកនិយមកណ្តាល ដែលបានជួយពង្រីកការគាំទ្រដល់រដ្ឋាភិបាល ទាំងក្នុងប្រទេសអ៊ីស្រាអែល និងនៅបរទេស នៅពេលដែលមានការកើនឡើងនូវសម្ពាធការទូត និងក្នុងស្រុក ក្នុងរយៈពេល ៨ខែនៃសង្រ្គាមនៅតំបន់ហ្កាហ្សា៕