ទីបញ្ជាការកណ្តាលអាមេរិក (CENTCOM) កាលពីថ្ងៃអាទិត្យ (ទី៩ ខែមិថុនា) បាននិយាយថា ក្រុមហ៊ួធីនៅប្រទេសយេម៉ែន បានធ្វើឲ្យនាវាពាណិជ្ជកម្ម ២គ្រឿងរងការខូចខាត នៅក្នុងការវាយប្រហារដោយមីស៊ីល ក្នុងឈូងសមុទ្រ Aden ក្នុងរយៈពេល ២៤ម៉ោងចុងក្រោយ ដោយនេះជាផ្នែកនៃយុទ្ធនាការដែលកំពុងបន្តមានរបស់ក្រុមជីវពលមួយនេះ ប្រឆាំងនឹងការដឹកជញ្ជូនតាមសមុទ្រអន្តរជាតិ។

CENTCOM បាននិយាយថា ក្រុមហ៊ួធីដែលគាំទ្រដោយអ៊ីរ៉ង់នេះ បានវាយប្រហារលើនាវា Tavvishi ជានាវាកុងតឺន័រដែលមានទង់ជាតិលីបេរីយ៉ា និងគ្រប់គ្រងដោយស្វ៊ីស ដោយមីស៊ីលបាលិស្ទិកប្រឆាំងនាវា។ CENTCOM បានបញ្ជាក់ថា នាវានេះរងការខូចខាត ប៉ុន្តែមិនមាននាវិកណាម្នាក់ រងរបួសនោះឡើយ។ 

ហើយ CENTCOM បានប្រាប់ទៀតថា មីស៊ីល ២គ្រាប់ដែលត្រូវបានបាញ់ដោយក្រុមហ៊ួធី បានធ្លាក់ចំនាវា Norderney ជានាវាដឹកទំនិញរបស់អាល្លឺម៉ង់ដែលកំពុងប្រតិបត្តិការ នៅក្រោមទង់របស់ប្រទេសអង់ទីហ្គានិងបាប៊ុយដា។ មិនខុសគ្នាដែរ CENTCOM បានអះអាងថា នាវានោះ បានរងការខូចខាត ប៉ុន្តែមិនមាននាវិកណាម្នាក់រងរបួសទេ ហើយក៏បានបន្តដំណើរទៅមុខទៀត។

នៅមុននេះ ក្រុមហ៊ួធីបាននិយាយថា ពួកគេបានវាយប្រហារទៅលើនាវា Tavvishi និង នាវា Norderney ហើយបានអះអាងថា ការវាយប្រហារនោះបានបណ្តាលឲ្យនាវាឆេះ។

គួរបញ្ជាក់ថា ក្រុមហ៊ួធី គ្រប់គ្រងផ្នែកដែលមានប្រជាជនច្រើនបំផុតក្នុងប្រទេសយេម៉ែន ហើយបានវាយប្រហារលើនាវាពាណិជ្ជកម្ម ចាប់តាំងពីខែវិច្ឆិកា ដែលជាការបង្ហាញពីសាមគ្គីភាពជាមួយប៉ាឡេស្ទីន នៅតំបន់ហ្កាហ្សា។ ក្រុមសកម្មប្រយុទ្ធបានវាយប្រហារពន្លិចនាវាមួយគ្រឿង រឹបអូសនាវាផ្សេង និងបានសម្លាប់សមាជិកនាវិក ៣នាក់ នៅក្នុងការវាយប្រហារមួយផ្សេងទៀត។

សហរដ្ឋអាមេរិក និងអង់គ្លេស បានធ្វើការវាយប្រហារលើគោលដៅនានារបស់ក្រុមហ៊ួធី ក្នុងការឆ្លើយតបនឹងការវាយប្រហារទាំងនោះ៕