អាមេរិក៖ យោងតាមសារព័ត៌មាន Reuters និងរបាយការណ៍ Washington Post ដោយដកស្រង់ការវាយតម្លៃពីក្រុមចារកម្មអាមេរិកថា ពួកតាលីបង់អាចដណ្ដើមយករដ្ឋធានីកាប៊ុលរបស់អាហ្វហ្គានីស្ថានក្នុងរយៈពេល ៩០ថ្ងៃលឿនជាងការគិតដំបូង ស្របពេលមានការដកកងទ័ពអាមេរិកចេញពីប្រទេសនេះ។
ក្រុមតាលីបង់ដណ្ដើមបានរដ្ឋធានីខេត្តចំនួន ៩ នៅក្នុងប្រទេសអាហ្វហ្គានីស្ថានចាប់តាំងពីថ្ងៃសុក្រ នៅក្នុងការវាយសម្រុកយ៉ាងខ្លាំងក្លាផ្នែកយោធា។ មន្ត្រីម្នាក់ដែលដឹងអំពីការវាយតម្លៃនេះបានប្រាប់សារព័ត៌មាន Reuters ថា ពួកតាលីបង់អាចវាយផ្ដាច់ខ្សែត្រៀមរដ្ឋធានីកាប៊ុលក្នុងរយៈពេល ៣០ថ្ងៃ និងចូលកាន់កាប់ទាំងស្រុងក្នុងរយៈពេល ៩០ថ្ងៃទៀត។ មន្ត្រីអាមេរិកម្នាក់ដែលនិយាយសុំមិនបញ្ចេញឈ្មោះបានប្រាប់សារព័ត៌មាន Washington Post ថា អ្វីៗកំពុងដំណើរការខុសទិសដៅ។
ទោះយ៉ាងណាលោកប្រធានាធិបតី Joe Biden បាននិយាយថា លោកមិនសោកស្ដាយចំពោះការសម្រេចចិត្តដកកងទ័ពអាមេរិកចេញពីប្រទេសឡើយ ដោយសង្កត់ធ្ងន់ថា កងកម្លាំងអាហ្វហ្គានីស្ថានត្រូវតែប្រយុទ្ធដើម្បីជាតិរបស់ពួកគេ។ លោក Biden បាននិយាយនៅក្នុងសន្និសីទសារព័ត៌មានមួយកាលពីថ្ងៃអង្គារថា ''សហរដ្ឋអាមេរិកបានចំណាយប្រាក់ជាង ១សែនកោដិដុល្លារអាមេរិកក្នុងរយៈពេល ២០ឆ្នាំមកនេះ''៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
