មន្ត្រីជាន់ខ្ពស់ក្រុមហាម៉ាស នៅថ្ងៃចន្ទនេះ បានជំរុញសហរដ្ឋអាមេរិកដាក់សម្ពាធលើអ៊ីស្រាអែល ឲ្យបញ្ចប់សង្រ្គាមនៅតំបន់ហ្កាហ្សា មុនពេលដំណើរទស្សនកិច្ចដែលបានគ្រោងទុកនៅថ្ងៃចន្ទនេះ ដោយរដ្ឋមន្ត្រីការបរទេសអាមេរិកលោក អង់តូនី ប្ល៊ីនខិន ទៅកាន់តំបន់នេះ ដើម្បីជំរុញកិច្ចខិតខំប្រឹងប្រែងបទឈប់បាញ់។

លោក ប៊្លីនខិន គ្រោងនឹងទៅបំពេញទស្សនកិច្ចនៅអេហ្ស៊ីប និងអ៊ីស្រាអែលនៅថ្ងៃចន្ទនេះ។ លោកក៏មានបំណងធានាថា សង្រ្គាមមិនរីករាលដាល ទៅក្នុងប្រទេសលីបង់ទេ។

មន្ត្រីជាន់ខ្ពស់ហាម៉ាស លោក Sami Abu Zuhri បាននិយាយថា៖«យើងអំពាវនាវឲ្យរដ្ឋបាលសហរដ្ឋអាមេរិក ដាក់សម្ពាធលើកងកម្លាំងដែលកាន់កាប់ ឲ្យបញ្ឈប់សង្គ្រាមនៅតំបន់ហ្កាហ្សា ហើយចលនាហាម៉ាសបានត្រៀមខ្លួនជាស្រេច ដើម្បីដោះស្រាយជាវិជ្ជមានជាមួយនឹងគំនិតផ្តួចផ្តើមណាមួយ ដែលធានាឲ្យមានការបញ្ចប់សង្គ្រាម»។

នៅក្នុងដំណើរទស្សនកិច្ចលើកទី៨របស់ខ្លួន ទៅកាន់តំបន់នេះ ចាប់តាំងពីក្រុមសកម្មប្រយុទ្ធហាម៉ាស បានវាយប្រហារអ៊ីស្រាអែលកាលពីថ្ងៃទី៧ ខែតុលា ដែលបង្កឲ្យមានការបង្ហូរឈាមបំផុត នៅក្នុងជម្លោះ   អ៊ីស្រាអែល-ប៉ាឡេស្ទីនអស់រយៈពេលជាច្រើនទសវត្សរ៍មកនោះ លោក ប្ល៊ីនខិន ក៏គ្រោងនឹងធ្វើដំណើរទៅកាន់ប្រទេសហ្ស៊កដានី និងកាតា ក្នុងសប្តាហ៍នេះ។

លោកគ្រោងនឹងជួបជាមួយប្រធានាធិបតីអេហ្ស៊ីប Abdel Fattah al-Sisi នៅទីក្រុងគែរ មុនពេលធ្វើដំណើរទៅកាន់ប្រទេសអ៊ីស្រាអែល នៅល្ងាចថ្ងៃចន្ទនេះ ជាកន្លែងដែលលោក នឹងជួបជាមួយលោកនាយករដ្ឋមន្ត្រី បេនចាមីន ណេតាន់យ៉ាហ៊ូ និងរដ្ឋមន្ត្រីការពារជាតិ លោក លោក យ៉ូអាវ ហ្គាឡែនធ៍ (Yoav Gallant)។ នេះបើយោងតាមកាលវិភាគរបស់ក្រសួងការបរទេស។