ប្រទេសជប៉ុន បានបើកវេទិកាថ្មីមួយជាមួយសហរដ្ឋអាមេរិក ដើម្បីបង្កើនទំនាក់ទំនងឧស្សាហកម្មការពារជាតិទ្វេភាគី ដោយទីក្រុងតូក្យូ បានពង្រីកតួនាទីរបស់ខ្លួន ដើម្បីជួយសម្ព័ន្ធមិត្តតែមួយគត់របស់ខ្លួន ខណៈដែលទីក្រុងវ៉ាស៊ីនតោន ប្រឈមមុខនឹងភាពតានតឹងក្នុងការផ្គត់ផ្គង់អាវុធដល់អ៊ុយក្រែន ដើម្បីប្រយុទ្ធប្រឆាំងនឹងការឈ្លានពានរបស់រុស្ស៊ី។

យោងតាមក្រសួងការពារជាតិជប៉ុនបានឲ្យដឹងថា កិច្ចប្រជុំនៃវេទិកាគ្រប់គ្រងនិងការថែរក្សានៃកិច្ចសហប្រតិបត្តិការឧស្សាហកម្មការពារជាតិ ឬ DICAS ដែលបានចាប់ផ្តើមកាលពីថ្ងៃអាទិត្យ ក្នុងប្រទេសជប៉ុន គ្រោងនឹងរួមបញ្ចូលការពិភាក្សាជាមួយក្រុមហ៊ុនការពារជាតិនៃប្រទេសទាំងពីរ និងការពិភាក្សាលើការជួសជុលនាវារបស់កងទ័ពជើងទឹកអាមេរិក។ 

ក្នុងអំឡុងពេលនៃការជួបជុំរយៈពេលបីថ្ងៃ ដែលបញ្ចប់នៅថ្ងៃអង្គារ អនុរដ្ឋមន្ត្រីការពារជាតិអាមេរិកទទួលបន្ទុកផ្នែកគ្រប់គ្រងនិងការថែរក្សា លោក William LaPlante គ្រោងនឹងទៅទស្សនារោងចក្រដំឡើងយន្តហោះចម្បាំង F-35 នៅខេត្ត Aichi ភាគខាងលិចទីក្រុងតូក្យូ។ នេះបើយោងតាមក្រសួងការពារជាតិសហរដ្ឋអាមេរិក។

DICAS គឺស្ថិតក្នុងចំណោមបញ្ជីគំនិតផ្តួចផ្តើម ដែលលោកប្រធានាធិបតី ចូ បៃដិន និងនាយករដ្ឋមន្ត្រីជប៉ុន ហ្វូមីអូ គីស៊ីដា (Fumio Kishida) បានប្រកាសនៅក្នុងកិច្ចប្រជុំកំពូលកាលពីខែមេសា ក្នុងទីក្រុងវ៉ា       ស៊ីនតោន ដើម្បីជំរុញកិច្ចសហប្រតិបត្តិការការពារជាតិ និងចារកម្មរបស់ពួកគេ។

ដោយប្រឈមមុខនឹងការគំរាមកំហែងដោយមីស៊ីលរបស់ចិន និងកូរ៉េខាងជើង ប្រទេសជប៉ុន កំពុងបង្កើនការចំណាយលើវិស័យការពារជាតិរបស់ខ្លួនទ្វេដងដល់ប្រហែល ២ភាគនៃទិន្នផលសេដ្ឋកិច្ចរបស់ខ្លួន ដែលត្រូវបានគេរំពឹងថា នឹងផ្តល់អត្ថប្រយោជន៍ដល់អ្នកម៉ៅការផ្នែកការពារជាតិ នៅក្នុងប្រទេស។