ប្តីប្រពន្ធប៉ាឡេស្ទីនលោក Mahmoud និងអ្នកស្រី Fatima Jarghoun បានលក់គ្រឿងអលង្កា និងទ្រព្យសម្បត្តិរបស់ពួកគេ ដើម្បីអាចធ្វើធម្មយាត្រាទៅកាន់ទីក្រុង Mecca របស់ប្រទេសអារ៉ាប៊ីសាអូឌីត គឺជាដំណើរមួយដែលពួកគេចង់ចូលរួមអស់រយៈពេលជិត ២ទសវត្សរ៍មកហើយ ។

ប៉ុន្តែដូចគ្នានឹងគ្រួសារប៉ាឡេស្ទីនជាច្រើនទៀតដែរនៅតំបន់ហ្កាហ្សាដែលសង្ឃឹមថានឹងបានចូលរួមពិធីបុណ្យហាជិក្នុងឆ្នាំនេះ គ្រួសារអ្នកស្រី Jarghoun មិនអាចចាកចេញបានឡើយ ដោយសារតែច្រកឆ្លងកាត់ព្រំដែន Rafah ជាមួយប្រទេសអេហ្ស៊ីប បានបិទ ។ 

អំឡុងពេលអង្គុយផឹកកាហ្វេជាមួយភរិយាក្នុងផ្ទះរបស់ពួកគេនៅទីក្រុង Khan Younis លោក Mahmoud និយាយថា ពួកយើងបានលក់គ្រឿងអលង្កា និងបានត្រៀមខ្លួនរួចរាល់ក្នុងការធ្វើដំណើរទៅកាន់ទីក្រុង Mecca ប៉ុន្តែវាគ្មានសំណាងឲ្យពួកយើងធ្វើដំណើរទៅបាននោះឡើយ ។

លោក Mahmoud ពន្យល់ថា វាបានធ្វើឲ្យគាត់ និងភរិយាគាត់ចំណាយពេលជិត ១៨ឆ្នាំ ទម្រាំមានឈ្មោះបានទៅចូលរួមធម្មយាត្រាមុនពិធីបុណ្យ Eid Al Adha មួយនេះ ៕