នៅថ្ងៃចន្ទនេះ រដ្ឋមន្រ្តីការបរទេសអាមេរិកលោក Antony Blinken បានធ្វើដំណើរទៅដល់ប្រទេសអេហ្ស៊ីប ចំពេលដែលទីក្រុងវ៉ាស៊ីងតោន ដាក់សំពាធក្រុមហាម៉ាស់ និងអ៊ីស្រាអែល ឲ្យឈានដល់បទឈប់បាញ់នៅតំបន់ហ្កាហ្សាស្រ្ទីប និងធានាថា សង្រ្គាមមួយនេះ នឹងមិនរីករាលដាលដល់ប្រទេសជិតខាងលីបង់នោះឡើយ ។

អំឡុងដំណើរទស្សនកិច្ចលើកទី ៨នៅតំបន់មជ្ឈិមបូព៌ា ចាប់តាំងពីក្រុមហាម៉ាស់វាយប្រហារអ៊ីស្រាអែលកាលពីថ្ងៃទី ៧ ខែតុលា ឆ្នាំ ២០២៣ ជាហេតុបង្កឲ្យកើតមានការបង្ហូរគ្នាដ៏អាក្រក់បំផុត នៅក្នុងជម្លោះអ៊ីស្រាអែល-ប៉ាឡេស្ទីនរយៈពេលច្រើនទសវត្សរ៍នោះ មន្រ្តីការទូតកំពូលរបស់សហរដ្ឋអាមេរិករូបនេះ នឹងបន្តដំណើរផងដែរទៅកាន់ប្រទេសហ្សកដានី និងប្រទេសកាតា ក្នុងសប្តាហ៍នេះ ។

លោក Blinken នឹងជួបពិភាក្សាការងារជាមួយប្រធានាធិបតីអេហ្ស៊ីបលោក Abdel Fattah al-Sisi មុនពេលបន្តដំណើរទៅកាន់ប្រទេសអ៊ីស្រាអែលនៅថ្ងៃចន្ទនេះ ជាទីដែលលោកនឹងជួបជាមួយនាយករដ្ឋមន្រ្តីអ៊ីស្រាអែលលោក Benjamin Netanyahu និងរដ្ឋមន្រ្តីការពារជាតិអ៊ីស្រាអែលលោក Yoav Gallant ។

ដំណើរទស្សនកិច្ចនេះដែរ បានកើតមានឡើង ក្រោយប្រធានាធិបតីសហរដ្ឋអាមេរិកលោក Joe Biden បានបញ្ចេញសំណើរបទឈប់បាញ់ ៣ដំណាក់កាលកាលពីថ្ងៃទី ៣១ ខែឧសភា ពីអ៊ីស្រាអែល ដែលអាចបញ្ចប់អចិន្រ្តៃយ៍ជម្លោះមួយនេះ ការដោះលែងចំណាប់ថ្នូរ និងអ្នកទោសប៉ាឡេស្ទីន ហើយនិងការកសាងតំបន់ហ្កាហ្សាឡើងវិញ ៕