ឯកអគ្គរដ្ឋទូតអាមេរិកប្រចាំប្រទេសជប៉ុន នៅថ្ងៃចន្ទ (ទី១០ ខែមិថុនា) នេះ បាននិយាយថា សហរដ្ឋអាមេរិកត្រូវការជំនួយពីប្រទេសជប៉ុន ដើម្បីទប់ទល់នឹងបញ្ហាប្រឈមជាយុទ្ធសាស្ត្រ នៅក្នុងទ្វីបអឺរ៉ុប និងអាស៊ី ដែលកំពុងប៉ះពាល់ដល់ឧស្សាហកម្មការពារជាតិរបស់ខ្លួន។

លោក Rahm Emanuel បានប្រាប់អ្នកសារព័ត៌មានថា៖ «យុទ្ធសាស្ត្រសន្តិសុខជាតិរបស់យើង តម្រូវឲ្យពួកយើងអាចដោះស្រាយជាមួយទិដ្ឋភាពចំនួន២ ដោយមួយជាជាសង្រ្គាមដ៏ធំ និងមួយទៀត ការប្រឈមុខដាក់គ្នា ហើយដោយទាំងនៅតំបន់មជ្ឈិមបូព៌ា អ៊ុយក្រែន និងការបន្តការរារាំងរបស់យើងដ៏គួរឲ្យជឿជាក់ នៅក្នុងតំបន់នេះ (អាស៊ីបូព៌ា) អ្នកអាចមើលឃើញរួចហើយថា យើងកំពុងស្ថិតនៅក្នុងទិដ្ឋភាព ២បន្ថែមទៀត»។

គួរបញ្ជាក់ថា កាលពីថ្ងៃអាទិត្យ (ទី៩ ខែមិថុនា) ប្រទេសជប៉ុន និងសហរដ្ឋអាមេរិក បានចាប់ផ្តើមកិច្ចចរចាលើកដំបូងរបស់ពួកគេ នៅទីក្រុងតូក្យូ ស្តីពីការកសាងកិច្ចសហការឧស្សាហកម្មការពារជាតិឲ្យកាន់តែស៊ីជម្រៅ ក្រោមវេទិកាសហរដ្ឋអាមេរិក-ជប៉ុន ស្តីពីកិច្ចសហប្រតិបត្តិការឧស្សាហកម្មការពារជាតិ លទ្ធកម្ម និងនិរន្តរភាព (DICAS) ដែលត្រូវបានបង្កើតឡើងក្នុងខែមេសា ដោយនាយករដ្ឋមន្ត្រីជប៉ុន លោក Fumio Kishida និងប្រធានាធិបតីសហរដ្ឋអាមេរិក លោក Joe Biden។

ហើយការពិភាក្សានៅថ្ងៃអង្គារ (ទី១១ ខែមិថុនា) រវាងរដ្ឋមន្ត្រីក្រសួងការពារជាតិសហរដ្ឋអាមេរិក ទទួលបន្ទុកផ្នែកលទ្ធកម្ម និងនិរន្តរភាព គឺលោក William A. LaPlante និងលោក Masaki Fukasawa ដែលជាប្រធានទីភ្នាក់ងារទទួលបន្ទុកបច្ចេកវិទ្យា និងភស្តុភាររបស់ជប៉ុន នឹងផ្តោតលើការជួសជុលកងនាវាចរ នៅជប៉ុន ដែលអាចជួយកាត់បន្ថយចម្ងាយផ្លូវរបស់សហរដ្ឋអាមេរិក ដើម្បីសាងសង់នាវាចម្បាំងបន្ថែមទៀត។

លោក Emanuel បាននិយាយថា៖ «ប្រទេសចិនមានសមត្ថភាពខ្លាំង ដែលយើងដឹងរួចហើយថា នឹងវ៉ាដាច់ពួកយើងលើផ្នែកសាងសង់នាវាថ្មី»។ ហើយលោកបានបន្ថែមថា កិច្ចសហប្រតិបត្តិការដ៏មានសក្តានុពលផ្សេងទៀត រវាងប្រទេសជប៉ុន និងសហរដ្ឋអាមេរិក រួមមានការជួសជុលយន្តហោះ ការផលិតមីស៊ីល និងការពង្រឹងខ្សែច្រវាក់ផ្គត់ផ្គង់យោធា៕