ប្រធានាធិបតីហ្វីលីពីន លោក ហ្វឺឌីណាន ម៉ាកូស ជូនៀ (Ferdinand Marcos Jr) បាន​និយាយ​ថា ប្រទេសនេះគួរតែត្រៀមខ្លួនសម្រាប់ព្រឹត្តិការណ៍ជាយថាហេតុណាមួយ ដោយ​សារ​តែ​ការ​គំរាម​កំហែង​ពី​ខាង​ក្រៅកាន់តែច្បាស់ ដែលជំរុញដោយភាពតាន​តឹង​កាន់​តែខ្លាំង​ឡើង​នៅ​ក្នុង​ឥណ្ឌូប៉ា​ស៊ីហ្វិក​។

លោក ម៉ាកូស បាននិយាយនៅក្នុងសុន្ទរកថាទៅកាន់កងទ័ពនៅឯជំរំយោធាក្នុងខេត្ត អ៊ីសា​ប៊ែលឡា​ (Isabela) នៅតំបន់ភាគខាងជើង ដែលប្រឈម​មុខ​នឹង​​កោះ​ស្វ័យ​គ្រប់​គ្រង​តាម​បែ​ប​ប្រជាធិបតេយ្យ តៃវ៉ាន់ ដែលត្រូវទីក្រុងប៉េកាំង បានចាត់ទុកជាទឹកដីរបស់ខ្លួនថា ការនៅ​ជិត​កោះ​តៃវ៉ាន់ របស់ហ្វីលីពីន ធ្វើឱ្យខ្លួនស្ថិតក្នុងតំបន់ដែលចិន ចាប់អារម្មណ៍។

លោក ម៉ាកូស បានបន្ថែមថា ប្រទេសហ្វីលីពីន មិនបាន​ព្យាយាម​គូស​ខ្សែ​បន្ទាត់​ឡើង​វិញ​លើ​ទឹក​ដី​អធិបតេយ្យ​ភាព រួមទាំងតំបន់សេដ្ឋកិច្ចផ្តាច់មុខរបស់ខ្លួននោះទេ ហើយប្រទេសនេះ​បាន​ប្តេជ្ញា​ការពារ​ខ្លួន ខណៈពេលដែលចូលរួមជជែកតាមការទូត។ ស្ថានទូតចិន នៅទីក្រុងម៉ានីល មិន​បាន​ឆ្លើយ​តប​ភ្លាមៗចំពោះសំណើសុំការអត្ថាធិប្បាយទេ។

ហ្វីលីពីន មានជម្លោះដែនទឹកដ៏យូរលង់ជាមួយចិន ដែលទាមទារ​ស្ទើរ​តែ​ទាំងអស់​នៃ​សមុទ្រ​ចិន​ខាង​ត្បូង ដែលជាច្រកសម្រាប់ពាណិជ្ជកម្មនាវាប្រចាំឆ្នាំជាង ៣ ពាន់ពាន់លានដុល្លារ។ តុលាការ​មជ្ឈត្តកម្ម​អចិន្ត្រៃយ៍ នៅទីក្រុងឡាអេ បានកាត់ឱ្យការអះអាងរបស់ប្រទេសចិន មិនមាន​សុពល​ភាព​ក្នុង​ឆ្នាំ២០១៦ ដោយនោះជាការសម្រេចដែលទីក្រុងប៉េកាំង បានច្រានចោល៕