ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទ បានគាំទ្រ​សំណើ​ដែល​បាន​បញ្ជាក់​ដោយ​ប្រធានាធិបតីសហរដ្ឋអាមេរិក លោក Joe Biden សម្រាប់បទឈប់បាញ់ រវាងអ៊ីស្រាអែល និង​ក្រុមហាម៉ាស នៅតំបន់ហ្កាហ្សាស្ទ្រីប និងបានជំរុញឱ្យក្រុមសកម្មប្រយុទ្ធប៉ាឡេស្ទីន ទទួល​យក​កិច្ច​ព្រមព្រៀងដែលមានបំណងបញ្ចប់សង្រ្គាមរយៈពេលប្រាំបីខែ។

ក្រុមហាម៉ាស បានស្វាគមន៍ចំពោះការអនុម័តសេចក្តីសម្រេចពង្រាងដោយសហរដ្ឋអាមេរិក ហើយ​បាន​និយាយនៅក្នុងសេចក្តីថ្លែងការណ៍ថា ខ្លួនត្រៀមជា​ស្រេច​ក្នុង​ការ​សហការ​ជាមួយ​អ្នក​សម្រប​សម្រួល​ជុំវិញការអនុវត្តគោលការណ៍នៃផែនការ ដែលស្របតាមការទាមទាររបស់ប្រជាជន និង​ការតស៊ូរបស់យើង។

រុស្ស៊ី បានអនុប្បវាទពីការបោះឆ្នោតរបស់អង្គការសហប្រជាជាតិ ខណៈ​សមាជិក​ក្រុម​ប្រឹក្សា​សន្តិសុខ​ចំនួន​១៤រូបទៀត បានបោះឆ្នោតគាំទ្រ​សេចក្តី​សម្រេច​សម្រាប់​ផែនការ​បទ​ឈប់បាញ់​បី​ដំណាក់​កាល​ដែលបានដាក់ចេញដោយ លោក Biden កាលពីថ្ងៃទី៣១ ខែឧសភា ដែលលោក​បាន​និយាយ​ថា ជាគំនិតផ្តួចផ្តើមរបស់អ៊ីស្រាអែល។ ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បាននិយាយទៅកាន់ក្រុមប្រឹក្សាបន្ទាប់ពីការបោះឆ្នោតថា «ថ្ងៃនេះយើង​បាន​បោះ​ឆ្នោត​ដើម្បី​សន្តិភាព»។

សេចក្តីសម្រេច បានស្វាគមន៍ចំពោះសំណើបទឈប់បាញ់ថ្មីនេះ ដែលបានចែងថា អ៊ីស្រាអែល បាន​ទទួលយកសំណើ និងបានអំពាវនាវឱ្យក្រុមហាម៉ាសយល់ព្រមទៅនឹងសំណើរនេះ ហើយ​ជំរុ​ញ​ឱ្យ​ភាគីទាំងពីរ អនុវត្តលក្ខខណ្ឌឱ្យបានពេញលេញដោយមិនពន្យារពេល និងគ្មានលក្ខខណ្ឌ។

ឯកអគ្គរដ្ឋទូតអង្គការសហប្រជាជាតិរបស់ប្រទេសអាល់ហ្សេរី លោក Amar Bendjama បាន​និយាយ​ទៅកាន់ក្រុមប្រឹក្សាថា វាផ្តល់នូវក្តីសង្ឃឹមដ៏ភ្លឺថ្លាដល់ប្រជាជនប៉ាឡេស្ទីន។ វាដល់ពេ​ល​ហើយ​ដែល​ត្រូវបញ្ឈប់ការសម្លាប់ប្រជាជន៕