​បាល់ទាត់៖ ​ខ្សែប្រយុទ្ធ​អា​ហ្ស​ង់​ទីន Lionel Messi បានចាប់ផ្តើម​ហ្វឹកហាត់​លើកដំបូង​ជាមួយ Paris Saint Germain នៅ​ថ្ងៃព្រហស្បតិ៍​ម្សិលមិញ បន្ទាប់ពី​ធ្វើ​សន្និសីទ​សារព័ត៌មាន​ផ្លូវការ​នៅ​ទីក្រុង​ប៉ារីស ​ក្រោយ​ការចាកចេញ​ពី Barcelona​។​

​​កីឡាករ​វ័យ ៣៤ឆ្នាំ​រូបនេះ​ទើបតែ​ត្រលប់​ពី​វិសមកាល​របស់ខ្លួន ​បន្ទាប់​ពី​ជួយ​ក្រុម​ជំរើសជាតិ​អា​ហ្ស​ង់​ទីន​ឈ្នះ​ពាន Copa America ហើយ​ត្រលប់​ទៅ​ទឹកដី Barcelona វិញ​ដើម្បី​ចរចា​កិច្ចសន្យា​ថ្មី​ក៏ត្រូវ​បរាជ័យ​ ដោយសារ​ច្បាប់​ហិរញ្ញវត្ថុ​តឹងរ៉ឹង​របស់ La Liga​។ ​​ការមកដល់​ទឹកដី​បារាំង​នេះ Lionel Messi បាន​ចុះហត្ថលេខា ២ឆ្នាំ​លេង​ឱ្យ PSG ដែល​ក្នុង​នោះគេ​នឹង​ទទួលបាន​ប្រាក់​ឈ្នួល ៣៥លាន​អឺរ៉ូ​ក្នុង​មួយឆ្នាំ​។ Lionel Messi គឺជា​អ្នក​ស៊ុត​បញ្ចូល​ទី​ច្រើន​បំផុត​ក្នុង​ប្រវត្តិសាស្ត្រ Barcelona ដោយ​រកបាន​សរុប ៦៧២គ្រាប់ ឈ្នះ​ពាន La Liga ១០លើក, UEFA Champions League ៤លើក, Copa del Rey ៧លើក ក៏ដូចជា​ឈ្នះ​ពាន​ឯកត្តជន Ballon d’Or ៦លើក​ច្រើនជាងគេ​។​

​​Messi បាន​ក្លាយជា​កីឡា​ករទី៤ ដែល​មកកាន់ Paris Saint Germain ដោយ​គ្មាន​តម្លៃ​ផ្ទេរ បន្ទាប់ពី​ខ្សែបំរើ​ហូ​ឡង់ Georginio Wijnaldum ពី Liverpool, ខ្សែការពារ​អេ​ស្ប៉ា​ញ Sergio Ramos ពី Real Madrid និង​អ្នកចាំទី​ឆ្នើម​អ៊ីតាលី Gianluigi Donnarumma ពី AC Milan​។​ ​​Messi នឹង​អាច​បង្ហាញខ្លួន​ដំបូង​ឱ្យ Paris Saint Germain ចុង​សប្តាហ៍​នេះ​តែម្តង​ក្នុង​សប្តាហ៍​ទី​២ នៃ​ក្របខណ្ឌបារាំង Ligue 1 ជួប​ជាមួយ Strasbourg៕

​អត្ថបទ​៖​នាង សុភា​វុ​ធ