គណៈវិនិច្ឆ័យបានចាប់ផ្តើមការជនុំជម្រះកាលពីថ្ងៃចន្ទ (១០ មិថុនា) នៅក្នុង​សំណុំ​រឿង​របស់​លោក ហាន់ធឺ បៃដិន (Hunter Biden) កូនប្រុសប្រធានាធិបតីសហរដ្ឋអាមេរិក ដែលត្រូវ​ចោទ​ប្រកាន់​ថា​បានកុហកអំពីការប្រើប្រាស់គ្រឿងញៀនខុសច្បាប់​នៅ​ពេល​លោក​បាន​ទិញ​កាំភ្លើង​ខ្លី​មួយ​ដើម​ក្នុងឆ្នាំ២០១៨។ គណៈវិនិច្ឆ័យចំនួន ១២ រូប បានជំនុំជម្រះអស់​ពេលប្រហែល​មួយ​ម៉ោង បន្ទាប់ពីបានស្តាប់ទឡ្ហីករណ៍បិទបញ្ចប់ ហើយមន្ត្រីតុលាការម្នាក់បាននិយាយថា គណៈ​វិនិច្ឆ័យ​នឹង​បន្តការជនុំជម្រះនៅម៉ោង ៩ ព្រឹក (ម៉ោងក្នុងស្រុក) នៅថ្ងៃអង្គារ (១១ មិថុនា) នេះ។

រដ្ឋអាជ្ញារដ្ឋាភិបាល លោក ដេរេក ហីនស៍ (Derek Hines) បានប្រាប់គណៈវិនិច្ឆ័យ ខណៈដែល​ការ​កាត់​ទោសព្រហ្មទណ្ឌលើកដំបូងលើកូនរបស់ប្រធានាធិបតី​កំពុងកាន់​តំណែង​រូប​នេះ​បាន​ឈាន​ដល់​ដំណាក់កាលចុងក្រោយរបស់ខ្លួនថា «យើងសុំឱ្យតុលាការ​រក​ឱ្យ​ឃើញ​នូវ​ច្បាប់​ដែល​អនុវត្ត​ស្មើភា​ពពោះចុងចោទរូបនេះ ដូចដែលអនុវត្តចំពោះអ្នកផ្សេងទៀត»។ លោក ហីនស៍ បន្ថែមថា «នៅពេលដែលលោក ហាន់ធឺ បៃដិន ជ្រើសរើសកុហក និងទិញកាំភ្លើង គឺលោក​បាន​បំពាន​ច្បាប់ហើយ។ យើងស្នើសុំ​ឱ្យ​គណៈវិនិច្ឆ័យ​ដាក់​ចេញ​នូវ​សាល​ក្រម​តែ​មួយ​គត់​ដែល​គាំទ្រ​ដោយ​ភស្តុតាងមានទោសរបស់លោក»។

លោក ហាន់ធឺ បៃដិន វ័យ ៥៤ ឆ្នាំ ដែលជាកូនប្រុសរបស់លោកប្រធានាធិបតី ចូ បៃដិន (Joe Biden) បានផ្ដល់ចម្លើយពីភាពគ្មានទោសចំពោះការចោទប្រកាន់ពីបទព្រហ្មទណ្ឌ ដែលរួម​មាន​ការ​កុហក​អំពីការប្រើប្រាស់គ្រឿង​ញៀន​របស់​ខ្លួន​នៅ​ពេល​ដែល​លោក​បំពេញ​ឯកសារ​ត្រួត​ពិនិត្យ​របស់​រដ្ឋាភិបាល សម្រាប់កាំភ្លើងខ្លីប្រភេទ ខូលត៍ ខូប្រា (Colt Cobra) និងកាន់កាប់អាវុធ​នេះ​ដោយ​ខុស​ច្បាប់រយៈពេល ១១ ថ្ងៃ។

មេធាវីការពារក្តី លោក អាបេ ឡូវែល (Abbe Lowell) បានប្រៀប​ធៀប​បណ្ដឹង​របស់​រដ្ឋាភិបាល​នេះ​ទៅ​នឹង​ការលេងសៀករហ័សកម្ម ដែលផ្តោតការ​យក​ចិត្ត​ទុក​ដាក់​លើ​ការ​ប្រើប្រាស់​គ្រឿង​ញៀន​តាំង​ពី​ច្រើន​ខែ ឬច្រើនឆ្នាំ មុនពេលការទិញកាំភ្លើងនោះដើម្បីបង្កើតការបំភាន់ថាលោក ហាន់ធឺ បៃដិន គឺជាអ្នកប្រើប្រាស់គ្រឿងញៀនក្នុងពេលដែលលោកទិញកាំភ្លើង៕