​បាល់ទាត់៖ ​ក្រុម​តោ​ខៀវ Chelsea ទីបំផុត​បានសំរេច​ជោគជ័យ​ហើយ​ក្នុង​ការនាំយក​ខ្សែប្រយុទ្ធ​ប៊ែ​ល​ហ្ស៊ិ​ក Romelu Lukaku ត្រលប់មក​ទឹកដី Stamford Bridge វិញ​ក្នុងតម្លៃ ៩៧.៥លាន​ផោន​ពី Inter Milan​។ ​​កីឡាករ​វ័យ ២៨ឆ្នាំ​រូបនេះ​បាន​ចុះហត្ថលេខា​រយៈពេល ៥ឆ្នាំ​ក្នុង​ការវិល​មកវិញ​នេះ បន្ទាប់ពី​ធ្លាប់​ចាក​ចេញពី​ក្លិបកាលពី​ឆ្នាំ២០១៤ ទៅកាន់ Everton ក្នុងតម្លៃ ២៨លាន​ផោន​។​

តម្លៃ​ផ្ទេរ​ដ៏​ខ្ពស់​នេះ​គឺ​ប្រកៀក​ប្រកិត​នឹង Jack Grealish ដែល​ផ្ទេរ​ពី Aston Villa ទៅ Manchester City ក្នុងតម្លៃ ១០០លាន​ផោន​បំបែក​កំណត់ត្រា Premier League​។​ ​Lukaku បាន​និយាយថា គេ​ធ្លាប់​នៅទីនេះ​កាលពី​ក្មេង​ដែល​ត្រូវ​រៀនសូត្រ​រឿង​ជាច្រើន តែ​ពេលនេះ​ការ​ត្រលប់​វិញ គេ​បាន​នាំយក​បទពិសោធន៍​ជាច្រើន​ដើម្បី​មកជួយ​ក្រុម​ក្នុងនាម​ជា​អ្នកគាំទ្រ Chelsea ម្នាក់​កាលពី​ក្មេង​។​ ​គិត​តាំងពី​ចាកចេញ​ពី Anderlecht ការចំណាយ​លុយ​ទិញ​សរុប​ទៅលើ Romelu Lukaku រាល់​ការផ្លាស់​នីមួយៗ​មានតម្លៃ​សរុប ២៩០លាន​ផោន​ហើយ ដែល​នេះ​ជា​តម្លៃ​ខ្ពស់បំផុត​មួយ​ក្នុង​ប្រវត្តិសាស្ត្រ​ពោលគឺ Chelsea ទិញ​ពី Anderlecht នៅ​ឆ្នាំ២០១១ ក្នុងតម្លៃ ១០លាន​ផោន ផ្ទេរ​ទៅ Everton តម្លៃ ២៨លាន​ផោន ផ្ទេរ​ទៅ Manchester United តម្លៃ ៧៥លាន​ផោន ផ្ទេរ​ទៅ Inter Milan តម្លៃ ៧៤លាន​ផោន និង​ចុងក្រោយ​មកកាន់ Chelsea វិញ​តម្លៃ ៩៧.៥លាន​ផោន​។

Romelu Lukaku ធ្លាប់ជា​អតីត​កីឡាករ​របស់ Chelsea ចន្លោះ​ឆ្នាំ២០១១ ដល់ ២០១៤ មុនពេល​ផ្ទេរ​ទៅកាន់ Everton ក្រោយ​ចំណាយពេល​មួយ​រដូវ​កាល​ក្នុង​លក្ខខណ្ឌ​ខ្ចី​នៅ Goodison Park​។​ ​Lukaku ស៊ុត​បញ្ចូល​ទី​បាន ៤២គ្រាប់​ក្នុងការ​បង្ហាញខ្លួន ៩៦ប្រកួត​ឱ្យ Manchester United តែ​ក៏បាន​ចាក​ចេញទៅ Inter Milan កាលពី​ឆ្នាំ២០១៩ ក្នុងតម្លៃ​កំណត់ត្រា​ក្លិប ៧៤លាន​ផោន​ជាមួយនឹង​កិច្ចសន្យា ៥ឆ្នាំ​។ ​Lukaku គឺជា​សមាជិក​សំខាន់​របស់ Inter Milan ដែល​ឈ្នះ​ជើងឯក Serie A រដូវ​កាល​មុន​ក្រោយ​រកបាន ២៤គ្រាប់ និង​បញ្ជូន ១១បាល់​៕

​អត្ថបទ​៖​នាង សុភា​វុ​ធ