នាព្រឹកថ្ងៃទី១១ ខែមិថុនា ឆ្នាំ២០២៤នេះ សាលាខណ្ឌ៧មករា បានរៀបចំ​ពិធី​ប្រកាស​ចូល​កាន់​តំណែង​ប្រធាន និងសមាជិកក្រុមប្រឹក្សាខណ្ឌ អាណត្តិទី៤ ក្រោមអធិបតីភាព ឯកឧត្តមកែ ប៊ុនឡេង សមាជិកក្រុមប្រឹក្សារាជធានីភ្នំពេញ តំណាងឯកឧត្តមប្រធានក្រុមប្រឹក្សារាជធានី និង​ឯកឧត្តម នួន ផារ័ត្ន អភិបាលរងរាជធានីភ្នំពេញ ។

អង្គពិធីនេះ ក៏មានការអញ្ចើញចូលរួមពីលោកថេង សុថុល អភិបាលខណ្ឌ៧មករា លោក​លោក​ស្រីគណៈ​អភិបាលរងខណ្ឌទាំងអស់ និងកងកម្លាំង មន្ត្រីរាជការ​ចំណុះ​សាលា​ខណ្ឌ​ជា​ច្រើន​រូប​ទៀត​ផងដែរ។

លោកថេង សុថុល អភិបាលខណ្ឌ៧មករា បានថ្លែងថា ក្នុងរយៈពេល៥ឆ្នាំ គណៈអភិបាលខណ្ឌ បាន​សហការល្អជាមួយក្រុមប្រឹក្សា ដោយសម្រេចបាននូវសមិទ្ធផលធំៗជាច្រើនទាំងផ្នែកពុទ្ធចក្រ និង​អាណាចក្រ ទទួលបាននូវសូចនករមួយប្រកប ដោយប្រសិទ្ធភាពខ្ពស់ ជាពិសេសចាត់​វិធាន​ការ​​ក្នុង​ការទប់ស្កាត់បទល្មើសផ្សេងៗ និងលុបបំបាត់នូវរាល់សកម្មភាពអសកម្មមួយចំនួន ដើម្បី​ធានា​​សន្តិសុខ និងសណ្ដាប់ធ្នាប់សាធារណៈ ជូនប្រជាពលរដ្ឋក្នុងមូលដ្ឋានបានល្អ។

ឈ្លៀតក្នុងអង្គពីធីខាងលើនេះដែរ ឯកឧត្តម នួន ផារ័ត្ន អភិបាលរងរាជធានីភ្នំពេញ មាន​ប្រសាសន៍​ថា៖ ក្រុមប្រឹក្សាខណ្ឌត្រូវ​បាន​តំណាង​ប្រជាពលរដ្ឋ​ផ្តល់​សេចក្តី​ទុកចិត្ត​បោះឆ្នោត​ជ្រើស​រើស​​​ជា​សមាជិកក្រុមប្រឹក្សាខណ្ឌ៧មករាអាណត្តិទី៤ ដើម្បីបន្តដឹកនាំ សំដៅ​ចូល​រួម​ថែ​រក្សា​សុខ​សន្តិភាព ស្ថេរភាព និងបន្តអភិវឌ្ឍឲ្យមានការរីកចម្រើនលើគ្រប់វិស័យបន្ថែមទៀត។ ក្នុង​ការ​អនុវត្ត​ការងារ​​ជាសមាជិក សមាជិកាក្រុមប្រឹក្សា ត្រូវខិតខំបម្រើផលប្រយោជន៍ និងសេចក្តីត្រូវការរបស់ ប្រជាពលរដ្ឋដោយស្មើភាព តម្លាភាព គណនេយ្យភាព សមធម៌ និងបរិយាប័ន្ន ជាពិសេស​មិន​ត្រូវ​ប្រកាន់​និន្នាការ​នយោបាយណាមួយនោះឡើយ ។

លោកសោម សុវណ្ណ ក្រុមប្រឹក្សាខណ្ឌ៧មករាបន្ត​អាណត្តិ បានប្តេជ្ញាខិតខំប្រឹងប្រែងឱ្យ​អស់​ពី​កម្លាំង​កាយ​ចិត្ត ក្នុងការដឹកនាំថ្នាក់រដ្ឋបាលខណ្ឌ ដើម្បីបម្រើផលប្រយោជន៍ប្រជាជន និង​គោរព​ច្បាប់​​រដ្ឋធម្មនុញ្ញ នៃព្រះរាជាណាចក្រកម្ពុជា។ អនុវត្តឱ្យបានតាមច្បាប់ ស្តីពីការ​គ្រប់​គ្រង​រដ្ឋបាល​រាជ​ធានី ខេត្ត ក្រុង ស្រុក ខណ្ឌ។ ប្តេជ្ញាបំពេញភារកិច្ច ដោយអនុលោមតាមគោលការណ៍ លិខិត​បទដ្ឋាន​ពាក់ព័ន្ធ​របស់រាជរដ្ឋាភិបាលកម្ពុជា ឱ្យមានប្រសិទ្ធភាពខ្ពស់។ ប្តេជ្ញាចូលរួម​ពង្រឹង​សាមគ្គីភាព ឯកភាពផ្ទៃក្នុងឱ្យបានល្អប្រសើរ។

ក្នុងនាមជាប្រធានក្រុមប្រឹក្សា អាណត្តិថ្មីនេះ រូបលោក​នឹង​បន្ត​ដាក់​ចេញ​ផែន​ការ​ការងារ​ថ្មីៗ​សំខាន់​ជា​បន្ត​បន្ទាប់ ពិសេសការបន្តពង្រឹងលើកិច្ចការងារបម្រើ និងការផ្តល់​សេវា​ឱ្យបាន​ល្អប្រសើរបំ​ផុត​ជូន​ប្រជាពលរដ្ឋ ស្របតាមយុទ្ធសាស្ត្រចតុកោណ របស់រាជរដ្ឋាភិបាល ៕ លីហេង