កងជីវពលហេសបូឡានៅប្រទេសលីបង់ បាននិយាយថា ប្រព័ន្ធការពារដែនអាកាសរបស់ខ្លួន បានទម្លាក់យានដ្រូនរបស់អ៊ីស្រាអែល នៅពីខាងលើប្រទេសលីបង់ភាគខាងត្បូង កាលពីថ្ងៃចន្ទ ហើយយោធាអ៊ីស្រាអែល បានបញ្ជាក់ពីការបាត់បង់យានដ្រូន។

យោធាអ៊ីស្រាអែល បាននិយាយថា៖«មីស៊ីលបាញ់ពីដីទៅលើអាកាសមួយគ្រាប់ ត្រូវបានបាញ់ទៅកាន់យានអាកាសគ្មានមនុស្សបើក (UAV) របស់កងទ័ពអាកាសអ៊ីស្រាអែល ដែលកំពុងប្រតិបត្តិការ ក្នុងដែនអាកាសលីបង់។ ជាលទ្ធផល UAV ត្រូវបានខូចខាត និងធ្លាក់ក្នុងទឹកដីលីបង់»។

ក្រុមហេសបូឡាគាំទ្រដោយអ៊ីរ៉ង់ បាននិយាយនៅក្នុងសេចក្តីថ្លែងការណ៍មួយថា ខ្លួនបានវាយប្រហារទៅលើយន្តហោះ Hermes 900 ដែលជាយន្តហោះឈ្លបយកការណ៍ និងវាយប្រហារ ដែលផលិតដោយអ៊ីស្រាអែល។

ព្រំដែនអ៊ីស្រាអ៊ែល-លីបង់ មានអរិភាពកើនឡើង ក្នុងសប្តាហ៍កន្លងមក ដោយទាំងយោធាអ៊ីស្រាអែល និងក្រុមហេសបូឡា បានវាយប្រហារទីតាំងនៅខាងក្រៅព្រំដែននេះ ជាកន្លែងដែលការបាញ់ប្រហារគ្នាទៅវិញទៅមក បានកើតឡើងឥតឈប់ឈរ  ហើយការកើនឡើងកាន់តែខ្លាំង។

កាលពីព្រឹកថ្ងៃចន្ទ ក្រុមហេសបូឡាហ បាននិយាយថា ខ្លួនបានវាយប្រហារដោយយានដ្រូនទៅលើទីតាំងយោធាអ៊ីស្រាអែល នៅតំបន់ខ្ពង់រាប Golan Heights។ យោធាអ៊ីស្រាអែល បានអះអាងថា ខ្លួនបានកំណត់អត្តសញ្ញាណយានដ្រូនចំនួនពីរគ្រឿងដែលឆ្លងកាត់ពីប្រទេសលីបង់ទៅកាន់ប្រទេសអ៊ីស្រាអែលភាគខាងជើង ហើយបានធ្លាក់ នៅតំបន់ភាគខាងជើងនៃតំបន់ខ្ពង់រាប Golan Heights។