សាស្ត្រាចារ្យមហាវិទ្យាល័យអាមេរិក ៤នាក់ កំពុងសម្រាកព្យាបាលនៅមន្ទីរពេទ្យ បន្ទាប់ពីពួកគេ ត្រូវបានជនមិនស្គាល់អត្តសញ្ញាណ បានចាក់ឲ្យរបួស នៅឯសួនសាធារណៈ ក្នុងប្រទេសចិន។

សេចក្តីថ្លែងការណ៍របស់មហាវិទ្យាល័យ បាននិយាយថា សាស្រ្តាចារ្យនៅមហាវិទ្យាល័យ Iowa Cornell បានរងរបួសនៅក្នុង «ឧបទ្ទវហេតុដ៏ធ្ងន់ធ្ងរ» អំឡុងពេលទៅលេងឧទ្យាន នៅក្នុងខេត្តJilin ភាគខាងជើងប្រទេស   ចិន។

តំណាងរដ្ឋ Iowa លោក Adam Zabner បាននិយាយថា បងប្រុសរបស់ខ្លួន ឈ្មោះ David គឺជាគ្រូម្នាក់ក្នុងចំណោមគ្រូបង្រៀនទាំង ៤នាក់ ដែលបានរងរបួស នៅក្នុងឧបទ្ទវហេតុនេះ ដែលលោក បានពិពណ៌នាថា ជាការចាក់នឹងកាំបិត។

លោកបាននិយាយថា ក្រុមនេះ បានទៅទស្សនាប្រាសាទក្នុងតំបន់មួយ កាលពីថ្ងៃចន្ទ នៅពេលដែលពួកគេត្រូវបានវាយប្រហារដោយបុរសម្នាក់ ដោយកាំបិត។

លោក Zabner បានអះអាងថា បងប្រុសរបស់ខ្លួន ត្រូវបានគេចាក់ចំដៃ នៅឯ Beishan Park ហើយកំពុងសម្រាកព្យាបាល នៅក្នុងមន្ទីរពេទ្យ។

លោក បានប្រាប់សារព័ត៌មាន CBS News ថា៖«គាត់មិនទាន់បានចេញពីមន្ទីរពេទ្យទេ នៅព្រឹកនេះទេ ប៉ុន្តែគាត់មិនអីទេ»។

អ្នកនាំពាក្យក្រសួងការបរទេសអាមេរិក បានប្រាប់សារព័ត៌មាន BBC ថា ពួកគេ បានដឹងអំពីរបាយការណ៍នៃឧប្បត្តិហេតុចាក់នឹងកាំបិតឲ្យរបួស នៅក្នុងទីក្រុង Jilin ប៉ុន្តែមិនអាចផ្តល់ព័ត៌មានបន្ថែមបានទេ។

មហាវិទ្យាល័យ Cornell បាននិយាយថា គ្រូបង្រៀនទាំង៤នាក់ បាននិងកំពុងបង្រៀន «ជាផ្នែកមួយនៃភាពជាដៃគូជាមួយសាកលវិទ្យាល័យមួយ នៅក្នុងប្រទេសចិន»។ ក្រុមនេះ ត្រូវបានអមដំណើរដោយសមាជិកនៃសាកលវិទ្យាល័យ Beihua នៅពេលពួកគេ ទៅលេងឧទ្យាននោះ កាលពីថ្ងៃចន្ទ។

អាជ្ញាធរចិន មិនទាន់ឆ្លើយតបចំពោះឧបទ្ទវហេតុនេះ នៅឡើយទេ ប៉ុន្តែរូបភាពនៃហេតុការណ៍នេះ ត្រូវបានចែករំលែកយ៉ាងឆាប់រហ័ស នៅលើប្រព័ន្ធផ្សព្វផ្សាយសង្គម។