លោក Ahmed គឺជាគ្រូបង្រៀនភាសាអង់គ្លេសមកពីប្រទេសស៊ីរី ដែលបានព្យាយាម ៤លើករួចមកហើយ ដើម្បីឡើងតាមរបងព្រំដែនបេឡារុស ដើម្បីធ្វើដំណើរទៅភាគខាងលិច ចូលទៅកាន់ប្រទេសប៉ូឡូញដែលជាសមាជិកសហភាពអឺរ៉ុប ជាកន្លែងដែលលោកអាចដាក់ពាក្យសុំសិទ្ធិជ្រកកោនបាន ។

លោកនិយាយថា លោកមកពីសង្រ្គាម ដើម្បីស្វែងរកជីវិតល្អប្រសើរជាងនេះ ។ ពួកយើងមកដើម្បីសន្តិភាពប៉ុណ្ណោះ ពួកយើងពុំបានប្រឆាំងនឹងនរណាម្នាក់នៅទីនេះនោះឡើយ ។

លោក Ahmed ស្ថិតនៅក្នុងចំណោមជនអន្តោប្រវេសន៍រាប់សិបនាក់ផ្សេងទៀត មកពីតំបន់មជ្ឈិមបូព៌ាដែលព្យាយាមឆ្លងកាត់ព្រំដែនតាមព្រៃ ។

នៅព្រំដែនម្ខាងទៀត ឆ្មាំព្រំដែនប្រដាប់អាវុធ និងទាហានប៉ូឡូញ បន្តឃ្លាំងមើលយ៉ាងដិតដល់ក្រុមជនអន្តោប្រវេសន៍ទាំងអស់នេះ ។

ខណៈពេលនោះដែរ គណបក្សសម្ព័ន្ធពលរដ្ឋនិយមកណ្តាលរបស់លោកនាយករដ្ឋមន្រ្តី Donald Tusk បាននៅមុខគេក្នុងការបោះឆ្នោតសភាអឺរ៉ុប កាលពីចុងសប្តាហ៍កន្លងទៅ ។

ប៉ុន្តែការទទួលបានសំឡេងឆ្នោតរបស់ប្រទេសនិយមស្តាំ ដែលអំពាវនាវឲ្យមានការគ្រប់គ្រងព្រំដែនយ៉ាងតឹងរឹងនោះ នឹងធ្វើឲ្យភាពតានតឹងកាន់តែឡើងកម្តៅខ្លាំងលើការធ្វើអន្តោប្រវេសន៍ ។

ប៉ូឡូញ និងសហភាពអឺរ៉ុប បានចោទប្រកាន់បេឡារុស និងរុស្ស៊ីថា កំពុងព្យាយាមធ្វើឲ្យរីករាលដាលភាពវឹករ ចាប់តាំងពីឆ្នាំ ២០២១រហូតមក ដោយពួកគេជំរុញឲ្យជនអន្តោប្រវេសន៍ ធ្វើដំណើរឆ្លងកាត់ព្រំដែន ៕