មហាសេដ្ឋី លោក Elon Musk កាលពីថ្ងៃចន្ទ (ទី១០ ខែមិថុនា) បាននិយាយថា លោកនឹងហាមឃាត់មិនឲ្យមានឧបករណ៍របស់ Apple នៅក្នុងក្រុមហ៊ុនរបស់លោក ប្រសិនបើក្រុមហ៊ុនផលិតទូរសព្ទ iPhone មួយនេះ រួមបញ្ចូលប្រព័ន្ធរបស់ក្រុមហ៊ុន OpenAI នៅកម្រិតប្រព័ន្ធប្រតិបត្តិការ។
តាមរយៈការបង្ហោះនៅលើបណ្ដាញសង្គម X ដែលលោកជាម្ចាស់នោះ លោក Musk ដែលក៏ជានាយកប្រតិបត្តិនៃក្រុមហ៊ុនផលិតរថយន្តអគ្គិសនី Tesla និងក្រុមហ៊ុនផលិតរ៉ុក្កែត SpaceX ផងដែរនោះ បានឲ្យដឹងថា៖ «នោះគឺជាការរំលោភលើសុវត្ថិភាពដែលមិនអាចទទួលយកបាន»។
ទាំងក្រុមហ៊ុន Apple និង OpenAI មិនបានឆ្លើយតបភ្លាមៗ ចំពោះសំណើរបស់សារព័ត៌មាន Reuters ដើម្បីសុំការអត្ថាធិប្បាយ។ នៅព្រឹកថ្ងៃដដែលនោះ ក្រុមហ៊ុន Apple បានប្រកាសពីលក្ខណៈពិសេសមួយចំនួននៃបញ្ញាសិប្បនិម្មិត (AI) នៅលើកម្មវិធី និងវេទិកាប្រតិបត្តិការរបស់ខ្លួន ហើយនិងភាពជាដៃគូជាមួយក្រុមហ៊ុន OpenAI ដើម្បីនាំយកបច្ចេកវិទ្យា ChatGPT ដាក់ចូលទៅក្នុងឧបករណ៍របស់ខ្លួន៕