រដ្ឋមន្រ្តីការបរទេសឥណ្ឌាលោក Subrahmanyam Jaishankar និយាយនៅថ្ងៃអង្គារនេះថា ឥណ្ឌា នឹងផ្តោតសំខាន់លើការស្វែងរកដំណោះស្រាយបញ្ហាព្រំដែនជាមួយចិន ដែលបានធ្វើឲ្យទំនាក់ទំនងប្រទេសជិតខាងទាំង ២ជាប់គាំងជាយូរមកហើយ ។ លោក ថ្លែងបែបនេះ ក្រោយបន្តកាន់តំណែងជារដ្ឋមន្រ្តីការបរទេសឥណ្ឌាសម្រាប់អាណត្តិទី ២ជាប់ៗគ្នា ។

គួរឲ្យដឹងថា ឥណ្ឌា និងចិន មានព្រំដែនរួមគ្នាប្រវែង ៣.៨០០គ.ម ដែលភាគច្រើននៃព្រំដែនទាំងនេះ ពុំត្រូវបានកំណត់ឲ្យបានច្បាស់លាស់នោះទេ ក្នុងនោះប្រទេសប្រដាប់អាវុធនុយក្លេអ៊ែរទាំង ២ ធ្លាប់មានសង្រ្គាមជាមួយគ្នាទៀតផង កាលពីឆ្នាំ ១៩៦២ ។

ពួកគេបានជាប់គំាងផ្នែកយោធាផងដែរ ចាប់តាំងពីខែកក្កដា ឆ្នាំ ២០២០រហូតមក ពេលដែលទាហានឥណ្ឌាយ៉ាងហោច ២០នាក់ និងទាហានចិន ៤នាក់ ត្រូវបានសម្លាប់ អំឡុងការប៉ះទង្គិចគ្នាដ៏អាក្រក់បំផុត ក្នុងរយៈពេល ៥ទសវត្សរ៍កន្លងមកនេះ ។

នាយករដ្ឋមន្រ្តីឥណ្ឌាលោក Narendra Modi បានស្បថចូលកាន់តំណែងកាលពីថ្ងៃអាទិត្យ សម្រាប់អាណត្តិទី ៣ជាប់ៗគ្នារបស់លោក នៅក្នុងពិធីដ៏អធឹកអធមមួយរៀបចំឡើងនៅវិមានប្រធានាធិបតី Rashtrapati Bhavan ស្ថិតក្នុងទីក្រុងញូវ ដែល្លី ដោយមានការចូលរួមពីក្រុមមេដឹកនាំមកពីប្រទេសក្នុងតំបន់ចំនួន ៧ ហើយលោកបានគូសបញ្ជាក់ពីគោលនយោបាយប្រទេសជិតខាងដំបូងរបស់រដ្ឋាភិបាលលោក ។

លោក Jaishankar និយាយប្រាប់ក្រុមអ្នកសារព័ត៌មានថា ប៉ុន្តែទំនាក់ទំនង និងបញ្ហាជាមួយចិន និងប៉ាគីស្ថាន គឺជារឿងផ្សេងគ្នា ។

លោកបញ្ជាក់ថា ពាក់ព័ន្ធជាមួយចិន នៅមានបញ្ហាមួយចំនួននៅតាមព្រំដែន ហើយការផ្តោតសំខាន់របស់ពួកយើង គឺរកវិធីដោះស្រាយបញ្ហាទាំងនេះ ៕