ប្រធានាធិបតីម៉ិកស៊ិកលោក Andrés Manuel López Obrador បានទទួលស្គាល់កាលពីថ្ងៃចន្ទថា អាជ្ញាធរ ត្រូវតែបង្កើតជំរំសម្រាប់ជនភៀសខ្លួន បន្ទាប់ពីអ្នកស្រុកប្រហែល ៤.២០០នាក់ បានភៀសខ្លួនចេញពីទីក្រុងមួយ នៅភាគខាងត្បូងរដ្ឋ Chiapas។

រដ្ឋអាជ្ញា បាននិយាយថា ប្រជាជននៅទីក្រុង Tila បានភៀសខ្លួនកាលពីចុងសប្តាហ៍ បន្ទាប់ពីក្រុមជនអន្ធពាលប្រដាប់អាវុធ បានបាញ់រះលើទីក្រុងនេះ និងបានដុតផ្ទះជាច្រើនខ្នង កាលពីសប្តាហ៍មុន។ នេះអាចជាការផ្លាស់ទីលំនៅដ៏ធំបំផុតនៅរដ្ឋ Chiapas ចាប់តាំងពីឆ្នាំ ១៩៩៧។

អ្នកស្រុកខ្លះ បានរំលឹកពីការចំណាយជាច្រើនថ្ងៃ ដែលជាប់ខ្លួននៅក្នុងផ្ទះរបស់ពួកគេ មុនពេលដែលទាហាន និងនគរបាលរដ្ឋ បង្ហាញវត្តមាននៅចុងសប្តាហ៍ ដើម្បីអនុញ្ញាតឲ្យពួកគេ ចាកចេញ។

រូបថតជាច្រើនដែលចែកចាយដោយអាជ្ញាធររដ្ឋ បានបង្ហាញឲ្យឃើញមនុស្សរត់គេចខ្លួន ដោយគ្រាន់តែស្ពាយកាបូបរបស់ពួកគេ ឬមានរបស់របរតិចតួចជាប់ខ្លួនតែប៉ុណ្ណោះ។

លោក López Obrador បានពណ៌នាការវាយប្រហារនេះថា ជា «ជម្លោះរវាងមនុស្សដូចគ្នា»នៃទីប្រជុំជន Tila ដែលជាការយោងជាក់ស្តែងចំពោះជម្លោះដីធ្លីដ៏រ៉ាំរ៉ៃរវាងកសិករ។