សារព័ត៌មាន NBC News បានរាយការណ៍កាលពីថ្ងៃចន្ទថា ក្រុមមន្ត្រី បានពិចារណាលើការចរចាកិច្ចព្រមព្រៀងឯកតោភាគីជាមួយក្រុមសកម្មប្រយុទ្ធប៉ាឡេស្ទីនហាម៉ាស ដើម្បីដោះលែងចំណាប់ថ្នូរជនជាតិអាមេរិក ៥នាក់ដែលត្រូវបានឃុំខ្លួន នៅតំបន់ហ្កាហ្សា ប្រសិនបើកិច្ចចរចាបទឈប់បាញ់ពាក់ព័ន្ធនឹងអ៊ីស្រាអែល បរាជ័យ។

ពុំច្បាស់ទេថា សហរដ្ឋអាមេរិក អាចផ្តល់អ្វីដល់ក្រុមហាម៉ាស ជាថ្នូរ បើយោងតាមរបាយការណ៍ដែលបានលើកឡើងពីមន្ត្រីអាមេរិកបច្ចុប្បន្នពីរនាក់ និងអតីតពីរនាក់។

សហរដ្ឋអាមេរិក និយាយថា ក្រុមហាម៉ាស កំពុងឃុំខ្លួនជនជាតិអាមេរិក ៥នាក់ ដែលត្រូវបានចាប់ធ្វើជាចំណាប់ថ្នូរ នៅក្នុងការលុកលុយដ៏សាហាវរបស់ក្រុមនេះកាលពីថ្ងៃទី៧ ខែតុលា នៅក្នុងទឹកដីអ៊ីស្រាអែលដែលបណ្តាលឲ្យមានការសងសឹកដ៏ធំរបស់អ៊ីស្រាអែល។ សារព័ត៌មាន NBC បានរាយការណ៍ថា ក្រុម    មន្ត្រីសង្ឃឹមថា នឹងអាចរកឃើញសាកសពជនជាតិអាមេរិក បីនាក់ផ្សេងទៀត ដែលត្រូវបានសម្លាប់ នៅថ្ងៃនោះ។

រដ្ឋមន្ត្រីការបរទេសអាមេរិក លោក អង់តូនី ប៊ីលនខិន បានសួរអំពីរបាយការណ៍នេះ នៅពេលលោកចាកចេញពីទីក្រុងគែរ បាននិយាយថា «មធ្យោបាយដ៏ល្អបំផុត មធ្យោបាយដ៏មានប្រសិទ្ធភាពបំផុត ដើម្បីឲ្យមនុស្សគ្រប់គ្នា បានត្រឡប់ទៅផ្ទះ រួមទាំងចំណាប់ថ្នូរអាមេរិក តាមរយៈសំណើនេះ គឺតាមរយៈកិច្ចព្រមព្រៀងឈប់បាញ់ ដែលត្រូវយកមកពិភាក្សានោះ។